Зулфия мукофоти совриндори, хонанда Ширин Абдуллаева вафот этди. Бу ҳақда Оила ва хотин-қизлар қўмитаси ҳамда «Ўзбекконсерт» маълум қилган.
Ширин Абдуллаева 2005 йил 14 декабрда Наманган вилояти Наманган шаҳрида туғилган. 2023 йилда у санъат йўналиши бўйича Зулфия номидаги Давлат мукофоти билан тақдирланган. Унинг «Лўли», «Метро», «Безори» ва бошқа қўшиқлари YouTubeʼда миллионлаб марта кўрилган.
Абдуллаева Пекиндаги Синхуа университетида Ижтимоий фанлар йўналишида ўқиётган бўлган ва 2024 йилда ўқишини Ўзбекистонга кўчирган. Университет Абдуллаевани «Ўзбекистоннинг Хитойдаги маданият элчиси» дея таърифлаган.
Ширин Абдуллаева, шунингдек, 2021 йилда Россиянинг НТВ каналидаги машҳур телекўрсатув — «Ты — Супер!» иштирокчисига айланган ва ярим финалгача борган.
Ширин Абдуллаеванинг вафоти ҳақида ёзилган постларда унинг вафоти сабаби сўраларкан, муаллифлар «Касал эди» дея жавоб беришган.
«Шаолин жанг санъатини ўрганган. Рус, хитой, инглиз тилларини мукаммал эгаллаган. Бир қатор киноларда роль ижро қилган. Клиплари интернетда анча танилган. Хитой университетида 100 фоизли грант билан ўқиётганди… Беғубор қиз эди. Ҳамкорликда қўшиқлар яратгандик», — дея таъзия билдирган хонанда ижро этган бир нечта қўшиқларнинг сўзлари муаллифи, шоир Бобур Бобомурод.
