Ayni damda buxorolik bir guruh pedagoglar Koreyada ta’lim safarida bo‘lib turishibdi. Xizmat safari davomida pedagoglar Koreyaning qator nufuzli ta’lim muassasalari va ilmiy-amaliy markazlarida bo‘lib, ta’lim tizimini rivojlantirishga qaratilgan ilg‘or tajribalar bilan yaqindan tanishmoqdalar.
Xususan, delegatsiya a’zolari zamonaviy “aqlli maktab” modellari joriy etilgan umumta’lim muassasalari, o‘qituvchilarning kasbiy rivojlanishiga ixtisoslashgan malaka oshirish markazlari hamda raqamli ta’lim yechimlari amaliyotga tatbiq etilayotgan ta’lim maydonchalari faoliyatini o‘rgandilar. Ushbu tashriflar jarayonida o‘quv jarayonini raqamlashtirish, STEAM-ta’lim, sun’iy intellekt elementlaridan foydalanish hamda o‘quvchilarni mustaqil fikrlashga yo‘naltirilgan metodikalar bo‘yicha amaliy taqdimotlar o‘tkazildi.
Safar davomida Koreya tomoni bilan ta’lim sohasida o‘zaro hamkorlikni rivojlantirish, tajriba almashish, onlayn va oflayn malaka oshirish dasturlarini yo‘lga qo‘yish, shuningdek, o‘qituvchilar va o‘quvchilar uchun qo‘shma loyihalarni amalga oshirish bo‘yicha qator kelishuvlarga erishildi. Ayrim ta’lim muassasalari o‘rtasida kelgusida hamkorlik memorandumlarini imzolash bo‘yicha dastlabki kelishuvlar ham amalga oshirilgan.
Shuningdek, buxorolik pedagoglar xalqaro seminar va davra suhbatlarida ishtirok etib, inklyuziv ta’lim, ta’lim sifati monitoringi, o‘qituvchining zamonaviy kompetensiyalari hamda ta’lim menejmenti masalalari bo‘yicha o‘z fikr va takliflari bilan qatnashdilar.
Safar doirasida delegatsiya a’zolari Koreya Respublikasining tarixiy va madaniy maskanlari bilan ham tanishib, bu orqali ikki xalq o‘rtasidagi do‘stona aloqalarni yanada mustahkamlashga xizmat qiluvchi ma’naviy taassurotlarga ega bo‘ldilar.
