Agar shaxs uyni boshqa bir shaxsga ijaraga bersa, ijara haqidan tushgan daromad soliq solinadigan daromad hisoblanadi.
Soliq kodeksining 375-moddasiga ko‘ra, mol-mulkni ijaraga berishdan olingan daromad mulkiy daromadlar toifasiga kiradi va jami daromad hisobiga qo‘shilib, daromad solig‘i solish obyekti sanaladi. Shuningdek, Soliq kodeksining 381-moddasiga asosan, bu daromaddan 12 foiz soliq undiriladi.
Biroq, agar shaxs uyini talabaga ijaraga bersa, soliqdan ozod qilinadi. Soliq kodeksining 378-moddasi 19-bandiga ko‘ra, uy-joyni talabalarga ijaraga berishdan keladigan daromad soliqdan ozod qilingan.
Bu holatda, talaba Fuqarolik kodeksining 600-moddasiga asosan uy-joy ijarasi shartnomasini tuzishi talab etiladi. Mazkur shartnoma Fuqarolik kodeksining 603-moddasiga binoan davlat soliq organlarida ro‘yxatdan o‘tkazilishi kerak.
