OpenAI компанияси ChatGPT платформасида касб танлаш ва иш топишга кўмаклашувчи янги функция — ChatGPT Jobsни синовдан ўтказмоқда. Бу ҳақда Hi-Tech Mail хабар берган.
Мазкур функция, айниқса, талабалар ва ёш мутахассислар учун фойдали бўлиши кутилмоқда.
ChatGPT Jobs мантиқан яқинда ишга туширилган ChatGPT Health бўлимига ўхшаш бўлиб, бироқ у соғлиқ эмас, балки карьера ва профессионал ривожланиш масалаларига йўналтирилган. Янги функция ChatGPT ни шахсий виртуал карьера маслаҳатчиси сифатида ишлатиш имконини беради.
У орқали фойдаланувчилар:
— резюмени таҳрирлаш ва яхшилаш;
— меҳнат бозорида ўзини тўғри намоён этиш;
— мос бўш иш ўринларини аниқлаш;
— келажакдаги карьера йўналишини режалаштириш каби масалаларда маслаҳат олишлари мумкин.
Функция тавсифида учта асосий йўналиш кўрсатилган: профессионал профиль ва резюмени такомиллаштириш, мос иш имкониятларини топиш ҳамда шахсий мақсадларга мос карьера вариантларини таққослаш. Ҳозирча ChatGPT Jobs’нинг барча имкониятлари тўлиқ очиқланмаган.
