Алишер Қодиров мактабгача ва бошланғич таълимда болалар ўз она тилида ўқиши кераклигини таъкидлади

Бугун, 6 январь куни Олий Мажлиси Қонунчилик палатасининг навбатдаги мажлиси бўлиб ўтди.

Мажлисда тазйиқ ва зўравонликдан жабрланган хотин-қизларни ҳимоя қилиш тизимини янада такомиллаштириш ҳамда боланинг энг устун манфаатларини таъминлашга қаратилган қонун лойиҳаси биринчи ўқишда кўриб чиқилди.

Ушбу қонун муҳокамасида «Миллий тикланиш» демократик партияси раҳбари Алишер Қодиров аёллар ва болаларни зўравонликдан ҳимоя қилиш учун алоҳида қонун қабул қилинаётганининг ўзи ачинарли ҳолат эканини айтди. Қодиров бу масалада халқаро ташкилотлар тавсиясига таянилаётгани ҳам уят эканини таъкидлади.

«Бизнинг қадриятларимизда аёл ва бола энг муқаддас тушунча бўлган. Буюк тарихга эга халқ сифатида бугун шундай муаммоларни муҳокама қилишга мажбур бўлаётганимиз ачинарли», деди у.

Депутат таълим тўғрисидаги қонунда белгиланган таълим тилини танлаш эркинлиги масаласига ҳам эътибор қаратиб, мактабгача ва бошланғич таълимда ҳар бир бола ўз она тилида тарбия ва билим олиши мажбурий норма сифатида қайд этилиши кераклигини таъкидлади. Акс ҳолда, болалар на тўлиқ таълим, на тўлиқ тарбия олаётганини айтиб ўтди.

«Биз бугун болаларимизни бегона тилда бошланғич таълим олишга мажбур қиляпмиз ва буни оқибати болаларимиздан мактабдан кутиладиган билимни, боғчадан кутиладиган тарбияни ололмаяпмиз» — дейди Қодиров.