Олий таълим, фан ва инновациялар вазири Қўнғиротбой Шариповнинг таъкидлашича, бугунги кунда талабаларни ётоқхона билан қамраб олиш даражаси 50 фоиздан юқорини ташкил этмоқда. Режага кўра, 3 йилдан кейин талабалар турар жойига бўлган эҳтиёж тўлиқ қондирилади.
Олий Мажлис Қонунчилик палатасининг мажлисида Олий таълим, фан ва инновациялар вазири Қўнгротбой Шариповнинг «Коррупцияга қарши курашиш бўйича давлат дастурларининг ижроси ҳамда соҳада коррупция омилларини бартараф этиш борасида амалга оширилаётган ишлар тўғрисида»ги ахбороти эшитилди.
Вазир Қўнғиротбой Шариповнинг маълум қилишича, яна 42000 ўринли талабалар турар-жойи яратилиши керак.
«Энди таққослаш учун айтай. Талабалар сони кескин ошяпти, лекин ётоқхона қурилиши бу 2-3 йил вақт оладиган жараён. Шу нуқтаи назардан озгина кечикишимиз бор. Лекин бугунги кунда биз 50 % дан ортиқ ёшларимизнинг ётоқхонага бўлган эҳтиёжини қондирганмиз ва яна айтамизки, яна уч йилдан кейин бу эҳтиёж тўлиқ қондирилади», — дейди вазир йиғилишда.
