Россияда 16 ёшгача бўлган болалар ва ўсмирлар учун барча ижтимоий тармоқларга киришни чеклаш таклиф қилинди. Бу ташаббус билан Россия Жамоат палатаси комиссияси аъзоси Евгений Машаров чиқди. Бу ҳақда «РИА Новости» хабар берди.
Аввалроқ, у Россияда интернетда 18+ белгиси қўйилган контентга кириш учун фойдаланувчиларни паспорт орқали мажбурий идентификация қилиш таклифини илгари сурган эди.
«Мен аввал интернетдаги сезгир маълумотларга фақат паспорт орқали киришни таклиф қилганман. Ўйлайманки, чекловларни жорий этишни давом эттириш керак. Ижтимоий тармоқларга кириш — фақат 16 ёшдан», — деган Машаров.
У чекловлар қаторида, компания-ишлаб чиқарувчилар Россия юрисдикциясида рўйхатдан ўтишга рози бўлмаган тақдирда онлайн ўйинларни блоклаш, WhatsAppʼни тўлиқ блоклаш ҳамда сунъий интеллект технологияларини умумий қоидалар асосида тартибга солишни ҳам қайд этган.
«Бу ишларни комплекс тарзда амалга ошириш керак, ижро этувчи ҳокимият органларига контентга киришни шундай созлашда ёрдам бериш лозимки, эртага биз болаларимизни кўчага чиқаришдан қўрқмайдиган бўлайлик», — дея хулоса қилди Машаров.
Шунингдек, Қозоғистонда ҳам 16 ёшдан кичик фойдаланувчиларнинг онлайн-платформаларда рўйхатдан ўтишини тақиқловчи қонун лойиҳаси тайёрланган. Шу тариқа, 16 ёшгача бўлган болаларга видеохостинглар, ижтимоий тармоқлар, контент платформалари ва ўхшаш сайтларида аккаунт яратиш мумкин бўлмайди.
Аввалроқ, Малайзия ҳам келаси йилдан 16 ёшгача бўлганлар учун ижтимоий тармоқларни тақиқламоқчи эканлиги ҳақида хабар берган эдик.
