Амалдаги тартибга кўра, дарс машғулотининг давомийлиги 45 дақиқа этиб белгиланган. Бу нормани юқори турувчи ташкилотнинг махсус кўрсатмаси бўлмай туриб, мутлақо ўзгартириб бўлмайди.
Вазирлар Маҳкамасининг 2017 йил 15 мартдаги 140-сонли қарори билан тасдиқланган «Умумий ўрта таълим тўғрисида»ги низомнинг 25-бандида таълим муассасаларида ўқув-тарбия жараёнини ташкил этишдаги аниқ муддатлар белгилаб берилган.
Яъни, таълим муассасаларида ўқув-тарбия жараёнини ташкил этишда қуйидаги муддатларга тўлиқ амал қилинади:
– ўқув йилининг давомийлиги — 34 ҳафта (I синфлар учун — 33 ҳафта);
– ўқув ҳафтасининг давомийлиги — 6 кун (педагогик кенгашнинг қарорига кўра I-IV синфлар учун — 5 кун);
– дарс машғулотининг давомийлиги — 45 дақиқа;
– дарс машғулотлар оралиғидаги танаффуснинг давомийлиги 5-10 дақиқа (ўқув куни ўртасидаги танаффуснинг давомийлиги 15-30 — дақиқа).
Мактаб маъмурияти юқорида белгилаб берилган муддатларга тўлиқ риоя қилиши зарур.
Хулоса қилиб айтганда, дарс жараёни вақтини 45 дақиқадан 40 дақиқага қисқартириш мумкин эмас.
Аммо дарс машғулотлари оралиғидаги танаффусларнинг давомийлигини 5 дақиқагача қисқартириш мумкин.
