Ўзбекистоннинг 38 та олий таълим муассасаси халқаро глобал экологик рейтингида ТОП-1000 таликдан жой олди. Бу ҳақда Олий таълим, фан ва инновациялар вазирлиги матбуот хизмати хабар қилди.
5 декабрь куни Тайванда UI GreenMetric 2025 экологик барқарор университетлар халқаро рейтингининг расмий натижалари эълон қилинди. Жорий йилда 105 давлатдан 1 745 та университет баҳоланган ушбу рейтингда Ўзбекистоннинг 79 та олий таълим муассасаси иштирок этди. Уларнинг 38 таси дунёнинг ТОП-1000 талигидан жой олган.
«2025 йилнинг мамлакатимизда «Атроф-муҳитни асраш ва яшил иқтисодиёт йили» деб эълон қилингани билан уйғун ҳолда университетларимизнинг халқаро экологик ташаббуслардаги иштироки тобора фаоллашмоқда.
Ўзбекистон олий таълим ташкилотларининг UI GreenMetric 2025 натижалари — бу таълим масканларимизда экологик масъулият, барқарор инфратузилма ва глобал стандартлардан ўрин олиш борасидаги қатъий ҳаракатларнинг ёрқин тасдиғидир», — дейилади вазирлик хабарида.
UI GreenMetric университетларнинг глобал экологик рейтинги ҳисобланиб, Индонезия университети томонидан 2010 йилдан бери ўтказиб келинади. Рейтингни тузувчилар илмий жамоатчилик эътиборини баъзи экологик муаммоларни ҳал қилиш учун атроф-муҳитни барқарор ривожлантириш сиёсати зарурлигига жалб қилишга интилади.
