Жорий йилда Ўзбекистон ОТМларида 65 мингдан ортиқ магистрант таҳсил олмоқда

Ўзбекистон олий таълим муассасаларида жорий ўқув йилида 65 минг 335 нафар магистрант таҳсил олмоқда. Улардан 42 626 нафари аёллар (65,24%), 22 711 нафари эса эркакларни (34,76%) ташкил этади.

Расмий маълумотларга кўра, магистратура талабалари таркибида ёшлар улуши юқори — 49 мингдан ортиқ магистрант 30 ёшдан кичик, 30 ёшдан катталар 16 мингдан зиёд.

Таълимни молиялаштириш шакли бўйича магистрантларнинг асосий қисми контракт асосида ўқиётгани қайд этилган. Хусусан,

– 50 197 нафар талаба тўлов-контракт;

– 15 138 нафар талаба давлат гранти асосида таҳсил олмоқда.

Магистрантлар таркибида 44 024 нафар талаба 1-курсда, 20 757 нафари   2-курсда, 553 нафар талаба эса 3-курсда таҳсил олмоқда.

Фуқаролик бўйича тақсимотда эса маҳаллий талабалар анча устунлик қилади. Ҳозир ОТМларнинг магистратура босқичида:

– 64 756 нафар Ўзбекистон фуқароси;

– 579 нафар хорижий давлат фуқароси таълим олмоқда.

Статистикага кўра, улар орасида яшаш жойи бўйича 29 476 нафар талаба ўз уйида, 28 030 нафари ётоқхонада, 7 047 нафари эса ижарада истиқомат қилмоқда.

Таълим шакли бўйича магистратура талабалари орасида кундузги бўлим етакчилик қилади:

– 59 374 нафар — кундузги;

– 1 187 нафар — кечки;

– 2 509 нафар — сиртқи;

– 1 063 нафар — масофавий шаклда ўқимоқда.

Маълумотлар реал вақт режимида HEMIS ахборот тизимидан олинмоқда.

Аввалроқ, Ўзбекистон ОТМларининг бакалавриат босқичида қанча талаба таҳсил олаётгани ҳақида хабар берган эдик.