Google фойдаланувчилари энди Google Gemini сунъий интеллект платформасидан ўзбек тилида ҳам фойдаланиши мумкин. Бу ҳақда Тошкентда бўлиб ўтган «Сунъий интеллект даврида етакчилик: стратегия ва инновация» панель сессиясида маълум қилинди.
Муҳокама иштирокчилари қаторида бўлган Google Cloud’нинг ҳукуматлар билан алоқалар ва давлат сиёсати бўйича раҳбари Марина Жунич Google Gemini платформаси энди ўзбек тилини қўллаб-қувватлаётганини айтиб ўтди.
Ушбу янгилик мамлакатда рақамли технологиялар ва сунъий интеллект экотизимини ривожлантиришда муҳим қадам бўлиб, маҳаллий мутахассислар, тадбиркорлар ва аҳоли учун замонавий АI ечимларидан она тилида фойдаланиш имкониятини яратади.
Google Gemini’да ўзбек тили жорий этилиши нимани англатади?
Googleʼнинг сунъий интеллект тизими — Google Gemini энди ўзбек тилида ишлай олади. Яъни, эндиликда ушбу тизим ўзбек тилида берилган саволларни эркин тушунади, тўғри талқин қилади ва табиий шаклда жавоб бера олади. Бу, аввало, ўзбек тилини глобал сунъий интеллект инфратузилмасига қўшиш орқали унинг қўлланиш доирасини янада кенгайтиради.
Аввал кўплаб хизматлардан фойдаланиш учун инглиз тилини билиш талаб этилган бўлса, энди мураккаб мазмундаги изоҳлар, илмий тушунчалар, кундалик саволлар, ижодий матнлар ёки техник топшириқларни ҳам ўзбек тилида шакллантириш мумкин. Бу айниқса ўқувчилар, талаба-ёшлар, тадқиқотчилар, журналистлар ва контент яратиш билан шуғулланаётганлар учун бир қанча қулайликлар яратиши мумкин.
Шунингдек, Gemini ўзбек тилининг хусусиятларини инобатга олган ҳолда матн яратиши, стилистик жиҳатдан тўғри жумлалар таклиф қилиши, таржима сифатини ошириши билан талабалар ва ўқитувчилар учун анча яхши ёрдамчи бўлади.
