Вазирлар Маҳкамасининг 2020 йил 31 декабрдаги «Олий таълим муассасаларида таълим жараёнини ташкил этиш билан боғлиқ тизимни такомиллаштириш чора-тадбирлари тўғрисида»ги 824-сонли қарорида академик мобиллик жараёнининг амалга оширилиш тартиби белгилаб қўйилган.
Унга кўра, академик мобиллик олий таълим муассасаси талабаларининг муайян вақт мобайнида республика ҳудудидаги ёки чет элдаги бошқа бир олий таълим муассасасига ўқиш мақсадида бориши ҳисобланади.
Мобиллик дастури икки ёки ундан ортиқ олий таълим муассасаси ўртасида ўзаро таълим тўғрисидаги келишув асосида ташкил этилади.
Талаба алмашинувининг икки асосий тури мавжуд:
Академик мобилликда талаба ўқиётган ОТМ билан ҳамкорлик қилувчи хорижий ёки маҳаллий университетлардан бирида қисқа муддатга ўқиш имкониятига эга бўлади.
Алмашинув дастурлари:
Дастурлар асосида талаба бир ёки икки семестр давомида хорижда ёки бошқа вилоятда таълим олиши мумкин.
Академик мобилликни таъминлаш ва талабанинг кредитлари олий таълим муассасаси томонидан тан олинишида қуйидаги ҳужжатлардан фойдаланилади:
– фанлар каталоги;
– белгиланган шаклдаги таълим тўғрисидаги келишув, маълумотнома ва сертификат.
Мазкур ҳужжатлар таълим олиш натижаларини акс эттиради ва олий таълим муассасасига кредитларни тан олиш ва кўчириб ўтказиш учун асос ҳисобланади.
Талаба томонидан олий таълим муассасаси таълим дастури бўйича тўпланган кредитлар миқдори бошқа олий таълим муассасасида белгиланган таълим олиш натижаларига мувофиқ ўзлаштириладиган кредитлар миқдорига тенг ҳисобланади.
Талаба жўнатувчи олий таълим муассасаси тавсиясига асосан қабул қилувчи олий таълим муассасасига академик мобилликни амалга ошириш учун зарур ҳужжатларни топширади. Жўнатувчи олий таълим муассасаси томонидан талабага белгиланган шаклдаги транскрипт тақдим этилади.
Талабанинг академик мобиллик даврида ўзлаштирилиши белгиланган таълим элементларини жўнатувчи олий таълим муассасасининг розилигисиз ва у билан келишмасдан ўзгартириш мумкин эмас.
Хориждаги ҳамкор олий таълим муассасалари, марказлар ва ташкилотларнинг таълим дастурларида белгиланган таълим олиш натижалари жўнатувчи олий таълим муассасасининг таълим дастури бўйича таълим олиш натижаларига мос келиши ёки уларни тўлдириши лозим. Мобиллик вақтида академик йил кўрсаткичлари таҳлил қилинади ва низомга асосан кредитлар тан олиниши белгиланади.
Қабул қилувчи олий таълим муассасасида талаба томонидан ўзлаштириладиган ўқув элементларининг тўплами ва улар олий таълим муассасасининг таълим дастурига интеграция қилинганлиги таълим тўғрисидаги келишувда аниқ кўрсатилган бўлиши лозим.
Қабул қилувчи олий таълим муассасасида ўзлаштириладиган кредитлар миқдори хорижда ўқиш даврига (3 — 6 ой ёки 1 — 3 йил) мутаносиб бўлиши керак. Жўнатувчи олий таълим муассасаси томонидан мобиллик даврида талабанинг ўзлаштирган (тўлиқ ёки қисман) кредитлари тан олинади.
Талаба жўнатувчи олий таълим муассасасига қайтиб келгач, мобиллик даврида тўпланган кредитлар миқдоридан келиб чиққан ҳолда амалдаги тартиб-қоидалар асосида уни кейинги курсга ўтказиш ёки курсда қолдириш белгиланади.
Олий таълим муассасаси академик мобиллик дастури бўйича режалаштирилган таълим элементларини ўзлаштириш учун талабани белгиланган шакл асосида рўйхатдан ўтказади ва мобиллик даврида ушбу элементларни ўзлаштириш имкониятлари таъминланиши мажбуриятини олади.
Ҳамкор университетлар, марказлар ва ташкилотлар билан биргаликда ишлаб чиқилган таълим дастурлари доирасида академик мобиллик учун таълим тўғрисидаги келишувларни тузиш зарур ҳисобланмайди.
Таълим тўғрисидаги келишувга мувофиқ академик мобиллик даврида талабанинг билим даражасини аниқловчи кўрсаткичлар олий таълим муассасаларининг баҳолаш тизимини бошқа баҳолаш тизимларига конвертация қилиш жадвали асосида қабул қилинади.
Стажировкани ўташ бўйича келишув талаба, олий таълим муассасаси ва қабул қилувчи ташкилот томонидан уч томонлама имзоланади.
Стажировка давомида талаба томонидан ўзлаштирилган билимларнинг ошкоралигини таъминлаш ва уларни тасдиқлаш мақсадида қабул қилувчи муассаса томонидан стажировкани ўтаганлик тўғрисида сертификат берилади.
