Таҳририятимизга ҳали супер контракт тасдиқланмаганига қарамасдан, бир қанча олийгоҳларда абитуриентлар дарс жараёнига киритилаётгани ва улардан оффлайн ариза олинаётгани ҳақида мурожаатлар келиб тушди. Жумладан, ушбу ҳолат Самрқанд давлат университетида ҳам кузатилган. Ҳолатга аниқлик киритиш мақсадида университет масъуллари билан боғландик.
Масъулларнинг маълум қилишича, жорий йилда супер контрактга ўқишга қабул қилиш тартиби кечикаётгани ва аллақачон дарс жараёнлари бошланганлиги сабабли супер-контрактда ўқимоқчи бўлган талабгорлар дарслардан ортда қолиб кетмасликлари учун ўқув жараёнига киритилган.
Ҳолатга қонуний изоҳ олиш мақсадида Олий таълим, фан ва инновациялар вазирлиги мутахассислари билан ҳам боғландик. Мутахассисларнинг таъкидлашича, ҳали супер контракт тасдиқланмасдан туриб, абитуриентни «кутилаётган талаба» сифатида ўқиш жараёнларига киритиш мумкин эмас. Чунки, агар ушбу талабага супер-контрактга қабул қилиш бўйича буйруқ чиқмаса, олийгоҳ ва талаба ўртасида низоли вазият келиб чиқиши мумкин.
Қонунчиликка кўра, Қабул комиссиясининг супер-контракт асосида ўқишга қабул қилиш бўйича буйруғи чиқмагунча абитуриент талаба ҳисобланмайди. Шунинг учун дарсларга қатнашиш ҳуқуқи ҳам фақат буйруқ чиққандан кейин берилади.
Вазирлик мутахассислари ушбу ҳолатда олий таълим муассасалари «кутилаётган талаба» билан бундай масалаларни олдиндан аниқлаштириб, барча шартларни келишиб олишлари зарурлигини келтириб ўтди. Чунки, талаба ўқиш даври давомида вақт ва моддий харажат қилган бўлади.
