Қашқадарё вилояти Косон туманида 2 ёшли қиз машина ичида қолиб кетиб вафот этгани ҳақида хабар бергандик. 11-центабр куни Жиноят ишлари бўйича Деҳқонобод туман судида айбланувчига суд ҳукми ўқилган.
Воқеа 20 июнь куни туманнинг Ушоқтепа маҳалласида бўлган. Ўша куни хусусий боғча директори Лола Ҳақназарова Спарк автомобилида шу маҳаллада яшовчи 2 ёшли қиз З.И. ва бошқа болаларни уйидан боғчага олиб кетган.
Бироқ З.И. «боғча мудирасининг ўз вазифаларини лозим даражада бажармагани ва эътиборсизлиги сабабли» автомашина ичида эшиклари ёпиқ бўлгани ҳолда соат 12:00 га қадар қолиб кетган. Оқибатда бола машина ичида вафот этган.
Суд ҳужжатида келтирилишича, 31 ёшли Лола Ҳақназарова 2024 йилда нодавлат мактабгача таълим ташкилотини ташкил қилиб, унга раҳбарлик қилиб келган. У белгиланган талабларга зид равишда 2022 йил 16 декабрда туғилган З.И.ни гарчи ёши етмаса ҳам боғчага қабул қилган.
Ҳақназарованинг ҳайдовчилик гувоҳномаси бўлмаган. Лекин шунга қарамай турмуш ўртоғига тегишли Спарк машинасида ҳар куни эрталаб болаларни уйларидан боғчага, кечда эса боғчадан уйларига ташиган.
2025 йил 20 июнь куни ҳам у 7 нафар болани Спаркъка миндириб, боғчага олиб борган. Болаларни транспорт воситасидан тушириш жараёнида 2,5 ёшли З.И.ни машинада унутиб қолдирган. 6 соат давомида эшиклари ва ойналари ёпиқ ҳолатдаги машина ичида қолиб кетган қизалоқ нафас ололмасдан, димиқиб вафот этган.
Судланувчи судда айбига иқрорлик билдирган.
«20 июнь куни эрталаб маҳаллада яшовчи 7 нафар болани яшаш уйларидан ўзим машинада олиб чиқдим. Улар орасида З.И. ҳам бор эди. Унинг ёши боғча ёшига етмаган бўлсада, онасининг илтимосига кўра қабул қилганман», — деган Ҳақназарова.
«Боғчага келиб, машинани йўл четида тўхтатдим. Сўнгра олд ўриндиқда ўтирган икки болани қўлимга кўтариб, орқа ўриндиқда ўтирган 5 нафар болани тушириш мақсадида машина орқа эшигини очиб қўйдим. Қўлимда кўтариб олган икки болани йўлдан боғча томонга ўтказиб қўйиб, машина олдига бораётганимда болалар ўзлари тушганини кўрдим. Шу пайт улардан иккиси хархаша қилишни бошлади. Шу билан овора бўлиб қолиб, машинадан барча болалар тушган-тушмаганига эътибор бермабман. Айни шу куни тарбиячи ишга келмаган, барча иш ўзимга қолиб кетганди. Тушгача болалар билан шуғулландим. 13:00 ларда болаларни ухлатдим ва шу пайт З.И. йўқлигини пайқаб қолдим», — деган судланувчи ўз кўрсатмасида.
Шу вақтда Ҳақназарованинг турмуш ўртоғи келиб, машина калитини сўраган. Шундан сўнггина қизалоқ машина ичида қолиб кетгани маълум бўлган.
Қизалоқнинг онаси судда боғча раҳбарининг эътиборсизлигини ҳеч нарса билан оқлаб бўлмаслигини айтган ва унга қонуний чора кўришни сўраган.
«Воқеа куни қизимни айнан Лоланинг ўзи соғ-саломат уйимиздан боғчага олиб кетган. Қандай-қилиб 5−6 соат давомида ўзлари қабул қилиб олган болани йўқлигини билмасликлари мумкин? Ахир ҳисоб-китоб, саноқ бўлиши керакку. Қизимнинг бу-боғчага биринчи марта келиши эмасди, у аллақачон бир неча ойдан бери келиб юрган эди. Қандай қилиб тушлик вақтигача, ҳатто тушлик пайтида ҳам битта боланинг йўқлигини сезмасликлари мумкин? Ҳеч бўлмаганда ўшанда эътибор қилишлари керак эди. Бундай эътиборсизликни ҳеч нарса билан оқлаб бўлмайди. Шунинг учун мен қонуний чора кўрилишини талаб қиламан», — деган қизнинг онаси.
Суд ҳукми билан Лола Ҳақназарова Жиноят кодексининг 116-моддаси 3-қисмида назарда тутилган жиноятни (Касб юзасидан ўз вазифаларини лозим даражада бажармаслик одам ўлимига сабаб бўлиши) содир қилишда айбли деб топилган. Унга 3 йил муддатга озодликдан маҳрум қилиш жазоси тайинланган. Жазони манзил колонияда ўташ белгиланган.
