Айни пайтда ўқишга тавсия этилмаган абитуриентлар томонидан келаётган энг кўп саволлардан бири бу табақалаштирилган тўлов контракти ҳақида бўлмоқда.
Ўтган йили 2 сентябрда қабул очилган лекин бу йилгиси ҳалигача тасдиқлангани йўқ. Демак, бироз кечикади.
Лекин жорий йилда супер-контракт нархлари ўтган йилгига қараганда арзонлашиши кутилмоқда.
Супер-контрактни бўлиб тўласа бўладими?
Ҳа, 4 га бўлиб тўлаш мумкин.
Супер-контрактда ўқишни хоҳлаганлар қачонгача ариза беради?
Ҳали супер-контракт учун аризалар қабул қилинмаяпти. Эртагаёқ ОТМга югуриб боришингиз шарт эмас. Аризани сентябрь ойида, ўқишлар бошлангач ОНЛАЙН берасиз (масалан, ўтган йили 2 сентябрдан ариза бериш бошланган).
Ким биринчи ариза берса, ўша биринчи қабул қилинади, деган қоида йўқ. Талабгорлар тўпланган баллга қараб тартибга солинади, яъни аввал юқори балл тўплаганларга имкон берилади.
Супер-контрактдагилар грант тақсимотида қатнаша оладими?
Ҳа, улар ҳам 1-курсдан кейин ўзлаштириши ва фаоллиги яхши бўлса, грантга даъвогарлик қила олади.
Ариза бериш учун ОТМга бориш керакми?
Йўқ. 4 йилдан буён супер-контракт учун аризалар онлайн қабул қилинадиган бўлди. Сиз уйингиздан чиқмаган ҳолда интернет орқали ариза юборасиз. Бунинг учун ОТМга келиш, кимнидир кабинетида навбат кутиш, кимларгадир илтимос қилиш шартмас. Ариза қабул қилинадиган сайт ишга тушгач, қўшимча хабар қилинади.
Ўқишга КИРГАНЛАР бошқа йўналишга супер-контрактни танлай оладими?
Масалан, биринчи ва иккинчи йўналишга бали етмади, лекин учинчи йўналишга ўқишга кирди. Абитуриент учинчи йўналишда ўқишни истамай, биринчи ёки иккинчи йўналишда супер-контрактда ўқий оладими?
Бу масала ҳозирча очиқ турибди, жорий йилги тартиб тасдиқланмаган.
Ўтган йили абитуриент ўзи танлаган БИРИНЧИ йўналишга кира олмаган, лекин 2, 3, 4 ёки 5-йўналишлардан бирига ўқишга кирган бўлса, унда истисно тариқасида фақат БИРИНЧИ танлаган йўналишида супер-контрактда ўқишига рухсат берилган эди. Бу истисно 2, 3 ёки 4-йўналишга тааллуқли эмас. Яъни 3 га кирган бўлса, 2-йўналишда супер-контрактда ўқий олмасди, фақат БИРИНЧИга рухсат берилганди. Жорий йилги тартиб тадсиқланса, қўшимча хабар берилади.
Ўқишга КИРА ОЛМАГАНЛАР исталган бешта йўналишда супер-контракт қила олишадими?
Ушбу масала ҳам ҳозирча номаълум. Аниқ бўлгач, хабар берилади. Ўтган йили бешала йўналишига ҳам ўқишга кира олмаган абитуриентлар исталган бешта йўналишдан бирини танлаб, супер-контрактда ўқишига рухсат берилган эди.
