Австралияда мактаб ўқитувчиларининг маъмурий ишларини камайтириш мақсадида сунъий интеллект (АI) асосида ишлаб чиқилган янги восита синовдан ўтказилди. Ушбу лойиҳа мамлакатдаги таълим тизимини рақамлаштириш ва ўқитувчилар учун самарали иш муҳитини яратишга қаратилган.
Австралия Таълим департаменти маълумотларига кўра, ушбу восита ўқитувчиларнинг ҳужжатлаштириш, дарс режалари тузиш, ўқувчилар баҳосини таҳлил қилиш каби маъмурий вазифаларини автоматлаштиришга ёрдам беради. Дастлабки синов натижалари ўқитувчиларнинг маъмурий иш ҳажми қарийб 25 фоизга камайганини кўрсатди.
Лойиҳа ташаббускорлари бу янгилик ўқитувчиларга асосий вазифа – ўқувчилар билан ишлашга кўпроқ вақт ажратиш имконини беришини таъкидлашмоқда. Шунингдек, янги восита дарс жараёнини сифат жиҳатидан яхшилаш ва индивидуал ёндашувни кучайтиришга ёрдам беради.
Бироқ, мутахассислар бундай технологиялардан фойдаланишда эҳтиёткорликни тавсия қилишмоқда. Уларнинг фикрича, сунъий интеллект мавжуд муаммоларни янада кучайтириши ва айрим ҳолатларда адолатсизликка олиб келиши мумкин. Шу боис, ушбу воситанинг ишлаш механизмлари ва алгоритмларини доимий равишда кузатиб бориш муҳим ҳисобланади.
Австралия ҳукумати ушбу лойиҳа муваффақиятли якунланса, уни мамлакат бўйлаб барча мактабларда жорий қилишни режалаштирмоқда.
