Жорий йилнинг 20-21 август кунлари пойтахтимиздаги Низомий номидаги Ўзбекистон миллий педагогика университетида Таълимни ривожлантириш республика илмий-методик маркази ҳамда Мактабгача ва мактаб таълими вазирлиги ҳамкорлигида умумий ўрта таълим мактаблари психологлари учун ташкил этилган ўқув-семинар ўтказилди.
Икки кун давомида ўтказилган машғулотларга Ўзбекистоннинг турли ҳудудларидан 220 нафар етакчи тренер-психологлар жалб этилган. Уларга соҳада улкан тажрибага эга бўлган 18 нафар тренерлар ўз билим ва тажрибалари билан бўлишди.
Тадбирдан кўзланган асосий мақсад мактаб психологларининг касбий билим ва кўникмаларини замонавий илмий ёндашувлар, инновацион методлар ҳамда амалий психология тажрибаси билан бойитиш, жумладан:
– Ўқувчиларнинг ёш ва индивидуал психологик хусусиятларини аниқлаш ва ҳисобга олиш усулларини қўллаш;
– Стресс, конфликт ва инқирозли вазиятларда самарали психологик ёрдам кўрсатиш стратегияларини ўрганиш;
– Ота-оналар ва педагоглар билан конструктив мулоқот олиб бориш кўникмаларини ривожлантириш;
– Таълим жараёнида мотивацияни ошириш ва ижобий психологик муҳит яратишдан иборат.
Ўқув семинарининг биринчи кунида иштирокчиларга психологик хизмат кўрсатишнинг норматив ҳужжатлари билан ишлаш, диагностика ва унинг турлари, «Рақамли ресурслари ва хизматлари» порталида ишлаш, шунингдек, мактаб психологи фаолиятига оид диагностик инструментлар, девиантология асослари бўйича маълумотлар берилган.
Бундан ташқари, тадбир доирасида психологлар учун эртак терапияси, реджио педагогика ва арт терапия бўйича кўргазмали хоналар ташкил этилган.
Биринчи кун якунида Мактабгача ва мактаб таълими вазири ҳамда мактаб психологлари ўртасида учрашув бўлиб ўтди. Мулоқот давомида мутасаддилар ва мутахассислар ўртасида мактабларда таълим муҳитини яна яхшилаш, ўқитувчиларнинг ва мактаб психологларининг касбий мотивациясини оширишга доир қатор масалалар муҳокама қилинган.
Машғулотларнинг иккинчи кунида эса иштирокчилар «Коррекция ва коррекцион методикалар»,»Ота-оналар билан ҳамкорлик. Ота-оналар мажлислари сценарийлари», «Профилактика: касбий ва ҳиссий сўниш, стрессларга бардошлилик» ҳамда «Таълим иштирокчилари учун тренингларни шакллантириш» каби мавзуларда билим ва тажрибаларини ошириш имкониятига эга бўлишди.
2 кунлик семинар якунида барча иштирокчилар ва тренерлар тегишли сертификатлар билан тақдирланди.
