8 август куни Президент Шавкат Мирзиёев раислигида олий таълим муассасалари битирувчиларининг бандлигини таъминлаш масалалари юзасидан кенгайтирилган йиғилиш бўлиб ўтди.
Йиғилишда Президент абитуриент танлов қилган 5 та олийгоҳдан бирортасига кира олмаган тақдирда, агар унинг тўплаган бали бошқа олийгоҳдаги тўлмай қолган йўналишга мос келса, ушбу олийгоҳ ректори томонидан у контракт асосида қабул қилинишини айтиб ўтди.
Якуний мандат натижалари эълон қилингандан сўнг, ўқишга киролмаган кўплаб абитуриентлар томонидан таҳририятимизга ушбу масала юзасидан саволлар келиб тушди.
Бу имконият қачондан кучга кириши ва қай тартибда амалга оширилиши юзасидан Олий таълим, фан ва инновациялар вазирлик мутахассислари билан боғландик.
Мутахассисларнинг маълум қилишича, бу имкониятни амалиётга жорий этиш учун расмий ҳужжат ҳали тасдиқланмаган. Президент топшириғи асосида ҳозирда ҳужжат лойиҳаси устида иш олиб борилмоқда.
Ҳужжат тасдиқлангач, вазирлик расмий саҳифалари орқали бу ҳақида эълон қилинади.
Шунингдек, Президент топшириғи асосида қарор ишлаб чиқиш жараёни қанча муддат давом этиши номаълумлиги, шу сабабли бу тартиб қачондан кучга кириши ҳақида аниқ маълумот йўқлиги айтилди.
