Кеча, 17 июль куни ОpenAI компанияси ChatGPT сунъий интеллекти учун навбатдаги инновацион функцияни ишга туширди. «Агент режими» деб номланган ушбу янги имконият ChatGPT га фойдаланувчи топшириғини мустақил равишда бажаришга рухсат беради.
Янги «агент режими», босқичма-босқич жорий этилмоқда ва у ChatGPT га ўзининг виртуал компьютери ёрдамида «ўйлаш» ва «ҳаракат қилиш» имконини беради.
«Масалан, фойдаланувчилар қуйидагича сўраши мумкин: «Календаримга қараб, яқин мижозлар билан учрашувлар ҳақида сўнгги янгиликлар асосида қисқача маълумот бер», ёки «тўрт кишилик японча нонушта тайёрлаш учун режала қил ва керакли маҳсулотларни сотиб ол», — дейилади компания блогида.
Ушбу функция Prо, Plus ва Теаm тариф режалари обуначилари учун мавжуд бўлади. У OpenAI нинг аллақачон мавжуд воситалари — Оperator (интернетда қидирув имконини беради) ва Deep Research (онлайн маълумотларни тўплаб таҳлил қилади) асосида ишлаб чиқилган.
ChatGPT энди нафақат маслаҳат беради, балки ҳаракат ҳам қилади
ОpenАI берган маълумотларга кўра, янги агент режими ёрдамида фойдаланувчилар қуйидаги каби вазифаларни топширишлари мумкин:
— «Календаримга қараб, олдинда турган мижозлар билан учрашувлар ҳақида менга қисқача маълумот бер»;
— «Тўрт кишилик япон нонуштасини тайёрлаш учун керакли маҳсулотларни режалаштир ва харид қил».
Ушбу функцияни ChatGPT иловасида «agent mode» (агент режими) тугмасини танлаб ёқиш мумкин. Ҳозирча у Prо, Plus ва Теаm тариф режаларидаги фойдаланувчиларга босқичма-босқич тақдим этилмоқда.
«Мен бу имкониятни оиламга «кенг илғор ва тажриба босқичидаги технология» деб тушунтирган бўлардим. Бу — келажакни синаб кўриш имконияти, аммо ҳозирча муҳим ишлар ёки шахсий маълумотлар учун фойдаланишга тавсия қилмайман,» — деб ёзган ОpenАI бош директори Сэм Альтман Х ижтимоий тармоғида.
ОpenАI мазкур функция билан боғлиқ хавф-хатарларни ҳам тан олди. Компаниянинг таъкидлашича, моделнинг фойдаланувчи маълумотларига кириш имконияти чекланган, электрон почта орқали хат юбориш каби айрим ҳаракатлар фойдаланувчининг розилигисиз амалга оширилмайди, банк операциялари каби юқори хавфли вазифалар эса бутунлай тақиқланган.
У нима иш қила олади?
Янги агент режими илгари ишлаб чиқилган Оperator (интернетда ахборот излаш) ва Deep Research(мураккаб таҳлилий ҳисоботлар тузиш) каби имкониятларни бирлаштиради. Эндиликда фойдаланувчилар ChatGPT ни Gmail, GitHub каби иловалар билан улаб, реал ҳаракатлар бажаришга топшириқ беришлари мумкин.
Масалан:
— «Беш кишилик инглиз нонуштаси учун масаллиқларни режалаштир ва буюртма қил.»
— «Тўртта рақобатчини таҳлил қил ва тақдимот туз.»
Қанчалик самарали?
ОpenAI нинг маълум қилишича, янги агент модели сунъий интеллект соҳасидаги энг мураккаб синовлардан бири бўлган «Humanity’s Last Exam» тестида 41,6% (pass@1) натижа кўрсатган. Бу компаниянинг илгари тақдим этган о3 ва о4-мини моделларидан деярли икки баравар юқори натижадир.
Шунингдек, математикада ҳам янги ютуқларга эришилган. FrontierMath номли мураккаб тестда агент 27,4% натижани қайд этган (илгари энг юқори натижа — 6,3%).
Хавфсизлик ва ахлоқий чекловлар ҳақидачи?
ОpenАI агент режимини ишлаб чиқишда хавфсизлик масалаларига алоҳида эътибор берган. Фойдаланувчи томонидан киритилган ҳар бир сўров махсус текширувдан ўтади. Айниқса, биологияга оид сўровлар учун қўшимча таҳлил механизми жорий этилган.
Бундан ташқари, агент орқали email юбориш каби ҳаракатлар фақат фойдаланувчи тасдиғи билан амалга оширилади. Банк операциялари каби юқори хавфли топшириқлар эса мутлақо блокланган.
Сунъий интеллект технологияларидаги рақобат кучаймоқда
Бу янгилик сунъий интеллект бозоридаги кескин рақобат шароитида эълон қилинди. Google ва Apple каби йирик технологик компаниялар ҳам ўз сунъий интеллект агентларини ишлаб чиқишга ҳаракат қилмоқда. ОpenАI эса ChatGPT ни оддий чатбот эмас, балки чинакам рақамли ёрдамчига айлантириш йўлида жиддий қадам ташламоқда.
Аввалроқ, ОpenАI сунъий интеллект асосида ишлайдиган янги веб-браузерни ишга туширишга тайёргарлик кўраётгани ва у орқали Google Chrome нинг глобал устунлигига қарши курашмоқчи экани ҳақида хабарлар чиққан эди.
