xAI компанияси Grok-4 нейрон тармоғининг янги версиясини тақдим этди. Тақдимот чоғида Илон Маск бу моделни «инсоният тарихидаги энг ақлли сунъий интеллект» деб атаган.
Ушбу Grok-4 модели математик олимпиадаларда рекорд натижалар кўрсатган ва мураккаб академик тестларни ечишда рақобатчиларидан икки баробар устун чиқган.
Шунингдек, у ҳар бир фан бўйича PhD (фан доктори) докторлик даражасидаги саволларни ҳам еча олган. Янги моделнинг асосий ва кучайтирилган Heavy версиялари мавжуд.
Энг муҳим ютуғи — Humanityʼs Last Exam тестида максимал ҳисоблаш ресурсларидан фойдаланган ҳолда 50,7% натижа кўрсатиши айтилган. Ушбу имтиҳон математика, табиий ва гуманитар фанлардан минглаб саволларни ўз ичига олади. Таққослаш учун: олдинги етакчи Googleʼнинг Gemini 2.5 Pro модели атиги 22% кўрсатган эди.
Heavy версияси 2025 йилги AIME математик олимпиадасида 100% тўғри жавоб берган. Шунингдек, ARC-AGI-2 тестида (визуал нақшларни таниш тести) 16,2% натижа кўрсатиб, энг яқин рақиб Claude Opus 4-ни деярли икки баробар ортда қолдирган.
Бундан ташқари, Grok-4 илмий кашфиётлар қилиш ва спорт воқеаларини олдиндан башорат қилиш қобилиятига ҳам эгалиги айтилмоқда.
Таъкидлаш жоизки, сунъий интеллект тобора ривожланиб бораётганлиги сабабли, соҳада ҳам рақобатлар кучаймоқда. Яқинда Мета Apple компаниясининг сунъий интеллект моделлар жамоасига раҳбарлик қилган Ruoming Pangни ишга олган. Маълумотларга кўра, унга бир неча йилга мўлжалланган, юз миллионлаб долларлик компенсация пакети таклиф қилинган.
