Гарвард университети чет эллик талабаларни АҚШ аэропортларида қатъий текширувлар, жумладан шахсий қурилмалар кўздан кечирилиши ва ижтимоий тармоқлардаги фаоллик таҳлил қилиниши мумкинлиги ҳақида огоҳлантирди.
Аввалроқ, АҚШ президенти Доналд Трамп Гарвард университетида таҳсил олаётган чет эллик талабаларнинг шахсий маълумотини сўраганлиги ҳақида хабар берган эдик.
Университетнинг халқаро алоқалар бўлими ва Гарвард ҳуқуқ мактаби томонидан ташкил этилган онлайн брифингда талабалар Фаластин, АҚШ сиёсати ва бошқа нозик мавзуларга оид контентларни эълон қилишда эҳтиёткор бўлишга чақирилган.
Гарвард университети қандай алгоритмлар ишлаётгани ва бу мониторинг қўлда ёки сунъий интеллект ёрдамида амалга оширилаётганини билмаслигини таъкидлаган. Бироқ улар ёпиқ (private) аккаунтлар ҳам текширувдан ҳимояланмаслигини, айниқса зўравонлик ёки таҳдид сифатида талқин қилиниши мумкин бўлган мавзуларда ҳазил қилишдан тийилишни тавсия қилган.
