2025 йил 14 июнь ҳолатига кўра, Google ўзининг ички ўқув платформаси — Growни тубдан янгиламоқда. Мақсад — ходимларни кундалик иш фаолиятида сунъий интеллект воситаларидан самарали фойдаланиш бўйича ўргатишга йўналтиришдир.
Аввал Grow платформаси маҳсулот яратиш, 3D-принтерлардан фойдаланиш, шахсий молияни бошқариш ва ҳатто Рубик кубигини ечиш каби кенг доирадаги курсларни таклиф этган. Эндиликда ушбу курсларнинг аксарияти сунъий интеллектга оид дастурлар билан алмаштирилган.
Ички ёзишмаларга кўра, 2025 йил баҳорида Grow курсларига ёзилган ходимларга режалаштирилган машғулотларнинг бекор қилингани ҳақида хабар берилган, мавжуд материаллар эса архивга жўнатилган. 10 йилдан ортиқ фаолият юритган Grow платформасида янгиланишдан аввал 500 мингдан ортиқ ўқув ёзувлари мавжуд бўлган ва бу тизим Googleʼда ишлаш учун муҳим мотивацион омил сифатида эътироф этилган.
Grow курсларини ишлаб чиққан мутахассисларга юборилган меморандумда компания раҳбарияти кўплаб курслар «фойдаланилмаётгани» ва «амалдаги иш фаолиятига мос келмаслиги»ни таъкидлаган. Ички форумларда эса ходимлар ўқув йўналишининг «бизнес устуворликлари»га бурилиши компания даромадига бевосита таъсир этувчи дастурларга эътибор кучаяётганини билдирган.
Grow платформасининг бу ислоҳоти Googleʼнинг илгари «ёқимли қўшимча» деб қаралган курслардан воз кечиб, бизнес учун бевосита аҳамиятли йўналишларга ўтаётганини кўрсатади. Мутахассислар буни компаниянинг операцион фаолиятини оптималлаштириш ва сунъий интеллект соҳасидаги кучли рақобат шароитида қидирув технологияларида етакчиликни сақлаб қолишга қаратилган стратегиясининг бир қисми сифатида баҳоламоқда.
Компания аллақачон бир нечта бўлимларда қисқартиришлар ўтказган ва ходимларга ихтиёрий ишдан кетиш эвазига компенсациялар таклиф қилмоқда.
