14 ёшли Сиддҳартҳ Нандяла сунъий интеллект ва тиббиёт соҳасида катта муваффақиятларга эришмоқда. Ҳиндистоннинг Анантапур шаҳрида туғилиб, ҳозирда АҚШнинг Техас штатидаги Фрицко шаҳрида яшайдиган бу ёш ихтирочи бутун дунёда сунъий интеллект бўйича энг ёш сертификатга эга бўлган мутахассис сифатида тан олинган. У Oracle ва АRМ каби йирик технологик компанияларнинг сертификатларига эга.
Сиддҳартҳ CircadiaV номли янгича сунъий интеллект иловасининг муаллифи ҳисобланади. Ушбу дастур юрак уришини телефон орқали ёзиб олиб, атиги етти сонияда юрак билан боғлиқ касалликларни аниқлаш имконини беради. Бу технология юрак хасталикларини эрта босқичда аниқлашда катта ёрдам беради.
CircadiaV дастури ҳозиргача АҚШда 15 000 дан ортиқ, Ҳиндистонда эса 700 нафардан кўпроқ беморда синовдан ўтказилган. Жумладан, Гунтур Давлат Шифохонасида ҳам бу тизим муваффақиятли синовдан ўтказилган. Дастур 96 фоиздан ортиқ аниқлик даражасига эга ва айниқса, етарли тиббий инфратузилмага эга бўлмаган ҳудудларда фойдали бўлиши кутилмоқда.
Андҳра-Прадеш штати бош вазири Н. Чандрабабу Наиду Сиддҳартҳнинг ишини юқори баҳолаб, уни катта ютуқ деб атади. «Ёш бўлишига қарамай, Сиддҳартҳнинг технологияни инсоният манфаатига йўналтираётганига қойил қоламан. У ҳақиқий илҳом манбаи. Унинг соғлиқни сақлаш технологиялари бўйича қилаётган ишлари тўлиқ қўллаб-қувватланади,» — дея таъкидлади Наиду.
Сиддҳартҳ фақат юрак хасталикларига оид дастур билан эмас, балки таълим соҳасида ҳам фаолият юритмоқда. У STEM IT номли таълим лойиҳасининг асосчиси ва раҳбари бўлиб, бу орқали бутун дунё ўқувчиларига информатика, робототехника ва сунъий интеллект йўналишларида билим беради. Мақсади — ёшларни технологиядан фойдали йўллар билан фойдаланишга ундаш.
Бундан ташқари, Сиддҳартҳ онг орқали бошқариладиган, яъни EEG (мия тўлқинларини ўқийдиган) технологиясига асосланган арзон протез қўл устида ҳам ишламоқда. Одатда, бундай юқори технологияли протезлар 400 000 доллардан ошади, аммо Сиддҳартҳнинг лойиҳаси бу нархни 300 долларгача туширишни кўзда тутган. Бу эса айниқса болалар ва иқтисодий имкониятлари чекланган беморлар учун катта енгиллик бўлади.
Сиддҳартҳнинг бу каби ишлари сиёсатчилар ва технология соҳасидаги мутахассислар томонидан ҳам эътироф этилган. Андҳра-Прадеш бош вазири Чандрабабу Наиду ва унинг ўринбосари Паwан Калян Сиддҳартҳни сунъий интеллект асосидаги тиббий ечимлар борасидаги илғор ишлар учун очиқчасига мақташган.
Шу ёшидаёқ технологиядан инсон ҳаётини яхшилаш йўлида фойдаланаётган Сиддҳартҳ Нандяла бутун дунё ёшларига илҳом бўлаётган ҳақиқий иқтидор эгасидир.
