Фарғоналик 17 ёшли йигит Гарвард университети талабасига айланди

2024 йилнинг 13 декабрь куни Ўзбекистон тарихида навбатдаги кам сонли ёшлардан бири – фарғоналик, 17 ёшли Азизбек Зайлобиддинов 100 % лик грант асосида Гарвард университет талабасига айланди. Бу ўз навбатида жамоатчиликнинг катта олқишига сабаб бўлди.

Бу университет шу даражада нуфузли эканлигидан бу ерни битирган талабалар дунёнинг исталган мамлакатида ишлаш имкониятига эга бўлади ва яхши мутахассис сифатида тан олинади.

Азизбекнинг Qalampir.uz берган интервьюсида айтишича, Гарвард университетига қабул қилиниш узоқ муддатни талаб қилади ва академик тарафлама номзод университет талабларига жавоб бера олиши керак. Билимнинг ўзи етарли эмаслигини таъкидлаган қаҳрамонимиз ўқишдан ташқари машғулотларда ҳам фаоллик кўрсатиш хориждаги олий таълим муассасаларига қабул қилиниш эҳтимолини оширишини билдириб ўтган.

Жумладан, Азизбек САТ дан 1520 ва ИЭЛТС дан 8 натижани қўлга киритган.

«Гарвард шундай университетки, у бакалавр даражасида ҳар бир қабул қилинган талабани ҳар қандай ҳолатда ўқишини хоҳлайди. Чунки уларда етарли маблағ мавжуд. Гарвардга кириб олиш қийин, лекин, грант ютиш муаммо эмас», – дейди Азизбек

Шунингдек, Азизбекнинг айтишича, ўзбек ёшларининг билим ва салоҳияти Гарвардга қабул қилиниш учун етарли, бироқ университет Америка Қўшма Штатларида жойлашганини инобатга олсак, биринчи навбатда олийгоҳ маҳаллий талабаларни қабул қилишни ва уларга билим беришни устун кўради. Қолган қисмларида эса, турли бурчаклардан келган ўқувчилар учун квоталар ажратилади.

«Хитой, Ҳиндистон каби давлатлардан ҳам йилига 2-3 та, ошиб кетса 4 нафар ўқувчи қабул қилинади. Университетнинг мақсади аввало америкалик ўқувчиларни қўллаш, ортган жойга эса хорижий талабаларни қабул қилиш», – дейди у.