Ўқишга кира олмаган кўплаб абитуриентларда супер-контракт билан боғлиқ саволлар пайдо бўлмоқда. Ушбу мақолада супер-контракт ҳақида батафсил маълумот берамиз.
2024-2025 ўқув йили учун супер-контракт нархи ва тартиблари ҳозирча тасдиқлангани йўқ. Тасдиқлангач, бу ҳақда қўшимча хабар берамиз.
2023-2024 йилги супер-контракт нархлари билан бу ерда танишиб чиқишингиз мумкин.
Супер-контрактнинг 4 баллгача шкаласи қуйидагича:
– ўтиш балига 1,05 баллгача етмаган абитуриентлар учун – базавий тўлов-контракт миқдорининг 1,5 баробари;
(масалан, контракт 10 млн сўм бўлса, 1 баллгача етмаганлар 15 млн сўм тўлайди);
– 1,06 баллдан 2,05 баллгача — 2 баробари;
– 2,06 баллдан 3,05 баллгача — 2,5 баробари;
– 3,06 баллдан 4,05 баллгача — 3 баробари.
Эслатма: 4,05 баллгача деб ёзилганига кўпчилик чалғимоқда ва буни 4,5 балл деб ўйлаяпти. 4,05 (тўрту юздан ноль беш) балл билан 4,5 (тўрт ярим) баллнинг фарқи катта. Кириш чизиғига 4,1 (тўрту бир) баллдан кўп етмаган абитуриентлар юқоридаги 4 баллик шкалага тушмайди.
4,1 балл ва ундан кўпроқ етмаганларнинг барчасига (56,7 баллдан баланд бўлса) 8, 10, 12, 15, 17 ва 25 баравар қўлланади.
Супер-контракт билан бир қаторда оддий контракт ҳам қўшиб тўланадими?
Биринчи йили фақат супер-контракт суммаси тўланади, оддий (базавий) контракт қўшиб тўланмайди. Иккинчи йилдан бошлаб эса фақат оддий контракт тўланади, супер-контракт тўланмайди.
Супер-контракда ўқишни хоҳлаганлар қайси муддатгача ариза бериши керак?
Ҳали супер-контракт учун аризалар қабул қилинмаяпти. Эртагаёқ ОТМга югуриб боришингиз шарт эмас. Аризани сентябрь ойида, ўқишлар бошлангач ОНЛАЙН берасиз.
Талабгорлар тўпланган баллга қараб тартибга солинади, яъни аввал юқори балл тўплаганларга имкон берилади.
Ариза бериш учун ОТМга бориш керакми?
3 йилдан буён супер-контракт учун аризалар онлайн қабул қилинадиган бўлди. Сиз уйингиздан чиқмаган ҳолда интернет орқали ариза юборасиз. Бунинг учун ОТМга келиш шартмас. Ариза қабул қилинадиган сайт ишга тушгач, қўшимча хабар қилинади.
Ўқишга КИРГАНЛАР бошқа йўналишга супер-контрактни танлай оладими?
Масалан, биринчи ва иккинчи йўналишга балли етмади, лекин учинчи йўналишга ўқишга кирди. Абитуриент учинчи йўналишда ўқишни истамай, биринчи ёки иккинчи йўналишда супер-контрактда ўқий оладими?
Бу масала ҳозирча очиқ турибди, жорий йилги тартиб тасдиқланмаган.
Ўтган йили абитуриент ўзи танлаган биринчи йўналишга кира олмаган, лекин 2, 3, 4 ёки 5-йўналишлардан бирига ўқишга кирган бўлса, истисно тариқасида фақат биринчи танлаган йўналишида супер-контрактда ўқишига рухсат берилган эди. Бу истисно 2, 3 ёки 4-йўналишга тааллуқли эмас. Яъни 3 га кирган бўлса, 2-йўналишда супер-контрактда ўқий олмасди, фақат БИРИНЧИга рухсат берилганди. Жорий йилги тартиб тадсиқланса, қўшимча хабар берилади.
Ўқишга КИРА ОЛМАГАНЛАР исталган бешта йўналиш бўйича супер-контракт қила олишадими?
Ушбу масала ҳам ҳозирча номаълум. Лекин ўтган йилги бешта йўналишга ҳам ўқишга кира олмаган абитуриентлар исталган бешта йўналишдан бирини танлаб, супер-контрактда ўқишига рухсат берилган эди.
Супер-контракт учун таълим кредити бериладими?
Супер-контракт учун таълим кредити берилмайди. Аммо айрим банклар тижорий шартларда оддий кредит таклиф қилиши мумкин.
Аммо супер-контрактга кирганлар 2-курсдан оддий контракт тўлашга ўтади, шу сабабли бемалол 2-курсдан таълим кредити олиши мумкин. Таълим кредити фақат кундузги таълим шаклига берилади.
