Temple университетининг 18 ёшли талабаси Тaйлер Сабапатҳий «Eagles» жамоасининг NFC чемпионлиги ғалабасини нишонлаш вақтида устундан қулаб, вафот этди.
Торонто шаҳри вакили бўлган Тaйлер университетнинг гимнастика клуби аъзоси бўлиб, жисмоний машқлар ва спорт фанлари бўйича таҳсил олаётган эди. Гувоҳларнинг сўзларига кўра, у устуннинг энг юқори қисмига чиқиб, кейин сирғаниб кетган ва боши билан ерга урилган.
Ҳодиса жорий йилнинг 26 январь куни «Eagles» жамоасининг «Washington Commanders» устидан 55-23 ҳисобидаги ғалабасидан сўнг содир бўлган. Унинг оғир жароҳати туфайли икки кундан сўнг шифохонада вафот этган.
Temple университети раҳбарияти чуқур ҳамдардлик билдирди
Temple университети президенти Джон Фрай ва талабалар ишлари бўйича вице-президент Джоди Баилей марҳумнинг оиласи ва яқинларига ҳамдардлик билдириб, қуйидаги баёнотни эълон қилди:
«Тайлер каби истиқболли, ёш инсоннинг фожиали тарзда ҳаётдан кўз юмиши биз учун катта йўқотиш. Унинг вафоти тушуниб бўлмас даражада оғир ва бутун университет жамоаси бу фожиани чуқур қайғу билан қабул қилмоқда. Бизнинг юрагимиз унинг оиласи, дўстлари ва яқинлари билан бирга.»
Тайлер Сабапатҳий бутун ҳаёти давомида гимнастика билан шуғулланган ва вилоят, минтақавий ҳамда халқаро мусобақаларда 120 дан ортиқ медаль ютган.
Шаҳар расмийлари хавфсизлик чораларини кучайтиришни муҳокама қилмоқда
Филаделфия шаҳар расмийлари ҳодиса юзасидан текширув олиб бораётганини маълум қилди. Аввалроқ, шаҳар маъмурияти йирик спорт тадбирларидан сўнг мухлисларнинг хавфсизлигини таъминлаш учун баъзи устунларни мойлаш каби чораларни кўрган эди. Бироқ ҳозирча Тайлер чиққан устунда бундай чоралар қўлланган-қўлланмагани ҳақида маълумот берилмаган.
Маҳаллий оммавий ахборот воситаларига кўра, полиция ва фавқулодда хизмат ходимлари 9 февраль куни Ню-Орлеанда бўлиб ўтадиган Super Bowl LIX финалида «Eagles» жамоаси «Kansas City Chiefs» устидан ғалаба қозонса, шундай ҳолатларнинг олдини олиш учун хавфсизлик чораларини кучайтириш масаласини муҳокама қилмоқда.
