Мактабгача ва мактаб таълими вазирлиги 2024 йил 17 декабрдаги №04-37-4269 сонли кўрсатма хати орқали таълим муассасаларида Янги йил тадбирларини ўтказиш бўйича кўрсатмаларни эълон қилди.
Ушбу кўрсатмалар мактабгача таълим муассасалари, умумтаълим мактаблари, ихтисослаштирилган, ижод ва Президент мактаблари учун тааллуқли.
Янги йил байрами доирасида тавсия этилган тадбирлар:
– таълим муассасалари ҳудудини, бинолар ва синфларни тозалаб, ҳудудда мавжуд бўлса, табиий арчани ўқувчи ва тарбияланувчиларнинг қўл меҳнати билан ясалган безаклар билан безаш;
– таълим муассасалари ҳудудида Янги йил тадбирларини қизиқарли шаклда ташкил этиш ва ҳудудни байрамона услубда безаш;
– мактабгача таълим муассасалари гуруҳлари ва бошланғич синф ўқувчилари учун тадбирларни ўқув жараёнига халақит бермаган ҳолда ўтказиш;
Катта синф ўқувчилари ўртасида қуйидаги танловларни ташкил этиш мумкин:
– Қўлда ясалган энг яхши безаклар (қоғоздан ясалган қор учқунлари ва бошқа Янги йил безаклари);
– «Энг чиройли безатилган синф»;
– «Энг яхши Янги йил табриги» (синф номидан мактаб, ўқитувчилар ва ота-оналар учун);
– Янги йил байрамига оид эртаклар ва театрал саҳналаштиришлар ташкил этиш тавсия этилади.
Қуйидаги чора-тадбирлар амалга оширилиши лозим:
– уйда Янги йилни оила даврасида нишонлаш бўйича ўқувчи ва уларнинг ота-оналари ўртасида тушунтириш ишларини олиб бориш;
– таълим муассасаларига пиротехника воситаларини олиб келиш ва ишлатишнинг олдини олиш чораларини кўриш;
– таълим муассасаси раҳбарияти ва синф раҳбарлари «эрталабги сафланишлар», «синф соатлари» ва ота-оналар йиғилишлари вақтида пиротехника воситаларини ишлатишнинг жиддий оқибатлари ҳақида тушунтириш ишларини ўтказиши лозим.
Тақиқланади:
❌ Табиий арчаларнинг шохлари ва тана қисмига шикаст етказиш ёки уларни байрам баҳонасида бошқа жойга кўчириш;
❌ Янги йилни нишонлаш баҳонасида ўқувчилар ёки ўқитувчилардан ноқонуний пул йиғишни ташкил этиш;
❌ Янги йил байрамларини ресторан, кафе ва бошқа овқатланиш жойларида ўтказиш, шунингдек, ўқувчилар ёки уларнинг ота-оналари номидан раҳбарият ёки ўқитувчиларга совға бериш.
