Илон Маск Google’нинг Gmail хизматига рақобатчи сифатида янги почта хизмати – Xmail ишлаб чиқилаётганини маълум қилди.
У Xmail’ни анъанавий почта платформаларига нисбатан соддароқ ва қулайроқ альтернатив сифатида тақдим этди. Хизмат дизайни мессенжерлардаги тўғридан-тўғри хабарлар (DM) интерфейсига ўхшаш бўлади.
Илон Маскнинг фикрига кўра, Xmail анъанавий электрон почта форматидан воз кечади. Унда узун мавзулар ва мураккаб форматлаштириш ўрнига, электрон хатлар чатга ўхшаш интерфейсда тақдим этилади. Бу эса хабар юбориш ва қабул қилиш жараёнини соддалаштиради. Бундай ёндашув тез ва самарали электрон почта хизматига эҳтиёжманд фойдаланувчиларга ёқиши мумкин.
Xmail’нинг ишлаб чиқилиши Маскнинг X’ни «ҳамма нарса учун мўлжалланган дастур»га айлантиришга қаратилган кенгроқ стратегияси билан уйғунлашади. Унинг режасига кўра, X фойдаланувчиларга аудио, видео, хабар алмашиш ва тўловлар каби турли функцияларни бир жойда тақдим этади.
Xmail’нинг муваффақияти ҳозирча номаълум. Аммо у 1,8 миллиарддан ортиқ фойдаланувчига эга Gmail каби рақобатбардош бозорга кириб келиши мумкин. Gmail ўзининг кенг имкониятлари, ташкилот воситалари, спам фильтри, Google Workspace билан интеграция ва хавфсизлик чоралари билан машҳур.
Шу билан бирга, DM стилидаги содда интерфейсга эга Xmail мураккаб ёки оғирдек туюлган анъанавий платформалардан чарчаган фойдаланувчиларни жалб қилиши мумкин. Электрон почтани бошқаришда рационал ёндашувни таклиф этиб, Xmail бозорда ўз ўрнини эгаллаши эҳтимоли бор.
Айни пайтда, Xmail’нинг чиқиш санаси ҳали аниқ эмас.
