Вазирлик тизимида Фан олимпиадалари маркази ташкил этилмоқда.
Ўзбекистон Республикаси Президентининг «Иқтидорли ёшлар билан ишлаш тизимини янада такомиллаштириш чора-тадбирлари тўғрисида»ги қарори қабул қилинди.
Қарорга асосан, Мактабгача ва мактаб таълими вазирлигининг Ихтисослаштирилган таълим муассасалари агентлиги ҳузурида давлат муассасаси шаклида Фан олимпиадалари маркази ташкил этилади.
Марказнинг асосий фаолият йўналишлари қуйидагилардан иборат:
– иқтидорли ҳамда фанларни чуқур ўрганишга қизиқадиган ўқувчиларни аниқлаш ва селекция қилиш, улардаги истеъдодни янада ривожлантириш учун зарур шарт-шароитлар яратиш;
– халқаро ва республика миқёсида мактаб фанлари бўйича ўтказиладиган олимпиада, мусобақа ва танловларни ташкил қилиш ва мувофиқлаштириш;
– олимпиадалар ўтказиш бўйича халқаро ҳамкорлик алоқаларини кенгайтириш, ушбу соҳадаги илғор хорижий тажрибаларни республика миқёсида оммалаштириш.
2025 йил 1-октабрга қадар:
– Марказда фанлар бўйича амалий топшириқларни ўтказиш учун замонавий асбоб-ускуналар ва хомашё материаллари билан тўлиқ жиҳозланган лаборатория ташкил қилинади.
2025 йилдан бошлаб:
– 5–8-синф ўқувчилари ўртасида ўтказиладиган олимпиадаларда юқори натижаларни қайд этган иқтидорли ўқувчилар базаси шакллантирилади ва уларни халқаро олимпиадаларга мақсадли тайёрлаш йўлга қўйилади;
– асосий фан олимпиадаларининг ҳудудий босқичида муваффақиятли иштирок этган иқтидорли ёшлар учун «Интеллектуал оромгоҳлар» ташкил этилади.
2025 йил 1 январдан бошлаб:
– нуфузли халқаро олимпиадаларда иштирок этадиган терма жамоалар раҳбарини жамоанинг натижасига қараб рағбатлантириш тартиби жорий этилади;
– терма жамоалар раҳбари нуфузли халқаро олимпиадаларда эришилган ҳар бир олтин, кумуш, бронза медаллари учун тегишлича базавий ҳисоблаш миқдорининг 35, 25, 15 баравари миқдорида бир марталик пул мукофоти билан тақдирланади;
– асосий олимпиадаларнинг ҳудудий ва республика босқичларида ҳамда халқаро олимпиадаларда ғолибликни қўлга киритган ўқувчилар, уларнинг ўқитувчилари ва терма жамоа раҳбарларига тўланадиган пул мукофотлари ва бериладиган совғалар даромад солиғидан озод этилади;
– халқаро олимпиадаларда қатнашиш учун жалб этиладиган номзодлар ўқув йиғинлари даврида Давлат бюджети маблағлари ҳисобидан бепул озиқ-овқат ва ётоқхона билан таъминланади.
2025 йил 1 майга қадар:
– асосий олимпиадаларнинг республика босқичи ғолибларига медаль бериш тизими жорий этилади.
Шунингдек, ушбу қарорга мувофиқ:
– миллатлараро тотувлик ва бағрикенглик ҳиссини шакллантириш, маданий-маърифий алоқаларни мустаҳкамлаш йўналишида — Буюк Шарқ Ренессанси халқаро олимпиадаси;
– математика ва информатика йўналишида — Ал Хоразмий номидаги ёшлар туркий олимпиадаси;
– кимё йўналишида — Абу Райҳон Беруний номидаги Халқаро кимё олимпиадаси;
– физика йўналишида — Аҳмад ал-Фарғоний номидаги Халқаро физика олимпиадаси;
биология йўналишида — Абу Али Ибн Сино номидаги Халқаро биология олимпиадаси ўтказиб борилиши белгиланди.
