Талабалар учун қайси норматив-ҳуқуқий ҳужжатларни билиш муҳим?

Ўзбекистон олий таълим тизими аниқ қонун ва қарорлар асосида фаолият юритади. Ушбу ҳужжатларни билиш талабаларга ўз ҳуқуқ ва мажбуриятларини тушунишда жуда муҳим. Қуйида энг асосий норматив-ҳуқуқий ҳужжатлар содда ва тушунарли тарзда келтирилган:

1. Ўзбекистон Республикасининг Конституцияси

Бу — мамлакатимизнинг асосий қонуни. Унда:

– таълим олиш ҳуқуқи;

– инсон ҳуқуқ ва эркинликлари;

– тенглик ва адолат тамойиллари белгилаб берилган.

Ҳар бир фуқаро, жумладан талаба ҳам, Конституцияда белгиланган ҳуқуқларга эга.

2. «Таълим тўғрисида»ги Қонун (23.09.2020)

Мазкур қонун таълим тизимининг асосий ҳужжати ҳисобланади. Унда:

– олий таълимга қабул қилиш тартиби;

– таълим шакллари (кундузги, сиртқи, масофавий);

– академик мобиллик;

– таълим сифати ва тенг имкониятлар белгиланган.

Талабанинг таълим жараёнидаги ҳуқуқ ва мажбуриятлари айнан шу қонунда мустаҳкамланган.

3. Вазирлар Маҳкамасининг 578-сон қарори (13.09.2025)

Ушбу қарор орқали:

– олий таълимга қабул қилиш;

– ўқишни кўчириш;

– академик мобиллик;

– қайта тиклаш;

– ўқишдан четлаштириш тартиблари белгиланган.

Талаба бошқа ОТМга ўқишини кўчирмоқчи бўлса ёки ўқишни тикламоқчи бўлса, айнан шу ҳужжатга таянилади.

4. Вазирлар Маҳкамасининг 31.12.2020 йилдаги қарори

Бу қарор:

– олий таълимда кредит-модуль тизимини жорий этиш;

– таълим жараёнини замонавийлаштиришга қаратилган.

Фанларни кредит асосида ўқиш, қайта ўзлаштириш ва академик юклама шу тизим орқали тартибга солинади.

5. Олий ва ўрта махсус таълим вазирининг 3069-сон буйруғи (26.09.2018)

Мазкур буйруқ:

– талабалар билимини баҳолаш ва назорат қилиш тартибини белгилайди.

Рейтинг, оралиқ ва якуний назоратлар айнан шу ҳужжат асосида ўтказилади.

6. Олий ва ўрта махсус таълим вазирининг 2431-сон буйруғи (26.02.2013)

Бу буйруқда:

– тўлов-контракт асосида ўқиш;

– контракт маблағларини тақсимлаш тартиби белгиланган.

Контракт суммаси, имтиёзлар ва тўлов тартиби шу ҳужжат билан боғлиқ.