2026 йилдан бошлаб мактабгача ва мактаб таълими соҳасига доир кўплаб янгиликлар амалиётга жорий этилади.
Жумладан, 2026 йилдан бошлаб:
– ҳар икки йилда бир марта «Йил ўқитувчиси» ҳамда «Касбий маҳорат етакчиси» танловлари ўтказилади. Танловлар ғолиблари базавий ҳисоблаш миқдорининг 1 400 бараварига тенг пул мукофоти билан тақдирланади;
– ҳар бир вилоятда боғча тарбиячилари педагогик маҳоратини оширишга методик кўмаклашувчи таянч «Янги авлод» боғчалари барпо қилинади.
– 10 дан зиёд халқаро ташкилотлар, 500 та нуфузли олийгоҳ ректорлари, 1 мингдан ортиқ халқаро экспертлар иштирокида Марказий Осиё халқаро таълим форуми ўтказилади.
– камида 15 йил стажга эга бўлган олий тоифали педагогларга ипотека кредити бошланғич бадалининг 25 фоизи қоплаб берилади;
– педагоглар учун давлат хизматлари тўлови 2 карра камайтирилади;
– фан ўқитувчилари каби бошланғич таълим ўқитувчилари учун ҳам миллий сертификат бериш тизими жорий қилинади;
– бакалавр босқичини имтиёзли диплом билан битириб, мактабга ишга кирган педагогларга 2-малака тоифаси, магистрларга 1-малака тоифаси берилади;
– рейтингда 100 таликка кирган мактаб ва боғча, 20 таликдаги техникум, ТОП-10 та олийгоҳ педагогларига йилига бир марта Ўзбекистон бўйлаб саёҳат қилиш учун самолёт ва поездлар чипта нархларига 15-20 фоиз чегирма берилади.
2026 йил 1 январдан бошлаб:
– «Келажак» марказларида ўқиганлик учун ота-оналар бадали тўлови ойига базавий ҳисоблаш миқдорига нисбатан белгиланган миқдорларда тўланади;
– умумий ўрта таълим ташкилотлари директор ва унинг ўринбосарларига фаолият самарадорлиги кўрсаткичлари (KPI) натижасига кўра базавий тариф ставкаларига нисбатан тегишлича 20 ва 10 фоиз миқдорида ҳар ойлик устамалар белгиланади.
