2025 йил 24–30 ноябрь кунлари давомида Қирғизистонда ЎРВИ ва грипп бўйича 37 068 та ҳолат қайд этилган. Бу ўтган ҳафтага нисбатан 2,5 баробар кўп. Бу ҳақда Қирғизистон Соғлиқни сақлаш вазирлигининг матбуот хизмати Давлат санитария-эпидемиологик назорати департаменти маълумотларига таяниб маълум қилди.
Маълум қилинишича, жорий йил 2 декабрь куни республикада ЎРВИ ва грипп бўйича эпидемиологик вазиятни муҳокама қилиш учун оператив штаб йиғилиши бўлиб ўтган.
Унда оператив штаб туманлараро санитария-эпидемиология марказларига нафақат боғчалар ва мактабларда, балки савдо марказларида ҳам, айниқса болалар ўйин майдончалари мавжуд бўлган жойларда профилактика ишларини кучайтиришни тавсия қилинган.
«Касалланиш суръати юқори даражада сақланиб қолса, болалар кўп тўпланадиган жойларда вақтинчалик чекловлар ва карантин чораларини жорий этиш масаласини кўриб чиқиш тавсия этилади», — дейилади хабарда.
Давлат санитария-эпидемиологик назорати департаменти инфекцион касалликлар назорати бошқармаси бошлиғи Динара Оторбоева таъкидлашича, эпидемиологик вазият ҳар куни назорат остида. Касалланганларнинг 73 фоизини 14 ёшгача бўлган болалар ташкил этади, уларнинг 5 фоизи шифохоналарга ётқизилган.
Касалланишнинг энг юқори кўрсаткичи Ўш ва Бишкек шаҳарлари, шунингдек Боткен ва Чуй вилоятларида кузатилмоқда.
Таъкидланишича, касалланиш ортиб бораётгани сабабли Бишкекда 25 та мактабгача таълим ташкилоти, Чуй вилоятида қарийб 40 та, Ўш вилоятида эса 5 та мактаб вақтинча онлайн ўқитишга ўтган.
Барча тиббиёт муассасаларида карантин чоралари кучайтирилган:
- мажбурий ниқоб тақиш тартиби жорий этилган;
- стационарга беморларнинг қариндошлари кириши чекланган;
- гриппнинг олдини олиш бўйича маълумотлар жойлаштирилган;
- хоналар мунтазам дезинфекция ва бактерицид қайта ишлашдан ўтказилмоқда.
Қайд этилишича, республика санитария-эпидемиология марказлари мутахассислари ЎРВИ ва гриппнинг янада тарқалишини олдини олиш учун барча зарур чораларни кўрмоқда. Вазият бўйича мониторинг 24 соат давомида олиб борилмоқда. Аҳоли кейинги қарорлар ва тавсиялар ҳақида ўз вақтида хабардор қилиб борилиши ваъда қилинган.
Аввалроқ, Қозоғистонда грипп ва ЎРВИ касаллиги кўпайгани сабаб мактаблар масофавий таълимга ўтказилаётгани ҳақида хабар берган эдик.
