Ўзбекистон Республикаси Вазирлар Маҳкамасининг (17.09.2021 йилдаги 572-сон) қарорида белгиланган низомнинг 47-бандида аттестация якунланганидан сўнг бир ой муддатда ваколатли вазирликлар раҳбарининг буйруғи билан аттестация натижаларига кўра, олий, биринчи ва иккинчи малака тоифалари ҳамда бош, етакчи ва катта ўқитувчи лавозимлари берилган педагог кадрларнинг рўйхати тасдиқланиши белгиланган.
Рўйхатга асосан педагог кадрларга ҚР-код қўйилган электрон шаклдаги сертификатлар ваколатли вазирликларнинг расмий веб-сайти орқали онлайн генерация қилинади.
Навбатдаги мажбурий ва навбатдан ташқари аттестация натижаларига кўра, малака тоифаси оширилган, сақланган ёки туширилган педагог кадрларнинг ойлик иш ҳақларига киритиладиган ўзгаришлар автоматик тарзда ҳисоблаб чиқарилиши учун ваколатли вазирликнинг расмий веб-сайти УзАСБО ёки бошқа молиявий ҳисоб-китоб дастурлари ҳамда мактаб бошқарув (ЭРП) дастурлари билан интеграция қилинади.
Педагог кадрлар давлат хизматлари марказига бориш ёки Ягона интерактив давлат хизматлари портали ёхуд ваколатли вазирликларнинг расмий веб-сайтида жойлашган шахсий кабинетига кириш орқали электрон шаклдаги сертификатни юклаб олиши мумкин.
Низомнинг 48-бандига кўра, педагог кадрларнинг базавий тариф ставкалари миқдори, уларнинг малака тоифаси ёки лавозими сертификат асосида белгиланади ҳамда уларнинг иш ҳақлари сертификат генерация қилинган кундан бошлаб қайта ҳисобланади.
Август декабрь ойларида ўтказилаётган аттестациянинг охирги куни 30 ноябрь ҳисобланади. Шундан келиб чиқиб, 1 декабрдан бошлаб бир ой ичида сертификатлар генерация қилиниши керак.
