Таълимни ривожлантириш республика илмий-методик маркази ташаббуси билан ёшларнинг ижодий тафаккури, руҳий ҳолати ва шахсий ривожланишини қўллаб-қувватлашга хизмат қиладиган лойиҳа — «Келажак яратувчилари» кўрсатувининг «Санъат терапияси қандай ёрдам беради?» янги сони тақдим этилди.
Унда «Меҳрли мактаб» давлат таълим муассасаси педагоги Шарифа Шарафходжаева санъат терапияси орқали болаларнинг ҳиссий кечинмаларини юмшатиш, стресс ва қўрқувни камайтириш, ички дунёсини эркин ифодалаш, мотивация ва ўқишга қизиқишни ошириш каби жараёнлардаги аҳамияти ҳақидаги фикрларини билдирган.
3 йил аввал очилган ушбу госпиталь мактаб онкогематология қошида даволанаётган болаларга таҳсил беради.
«Бу болажонлар кўпроқ менга дарс беради. Айнан, ҳаёт дарсликларини мен улардан ўрганаман. Чунки шундай қийин аҳволга тушган бола, айнан бугунга шукроналикни ўргатади» — дейди арт-педагог.
Мутахассиснинг фикрича, болалар айнан расм орқали ўзларининг ички дунёсини очади. Айнан арт терапия орқали болаларнинг фокусини касалликка эмас, ҳаётсеварликка қараб ўзгартириш мумкин.
«Бир марта мен билан шундай воқеа бўлди. Мен битта болани чизган асарини халқаро танловга жўнатганман. У ғолиб бўлди, лекин мен бу болага ушбу янгиликни айтишга мен улгура олмадим. Эртасига у реанимацияга тушиб қолган. Мактабга келганимдан кейин у бола ўтиб қолганини эшитиб, мен ўзимни кечира олмадим. У ахир кутганку. Балки бу унга куч берган бўлар эди» — дейди у.
