Савол: Яқинда мактаб директорлари учун мўлжалланган менежерлик курсида ўқиб, сертификат олгандим. Сертификатни «завуч»га кўрсатиб, қўшимча устама ёзиб беринг десам, бу устама сиз учун эмас, деяпти. Ахир мен 1 ой ўқиб, сертификатни қўлга киритдимку, «завуч»нинг бу ҳаракатлари қонунийми?
Вазирлар Маҳкамасининг 2023 йил 25 декабрдаги 681-сон қарори билан мактаб директори лавозимига номзодларни менежерлик ўқув курсларида ўқитиш ва уларга менежерлик сертификатини бериш тартиби тўғрисидаги низом тасдиқланган.
Низомга кўра, мактаб директори лавозимига номзодлар камида бакалавр даражасига ҳамда мактаб директорларı учун белгиланган малака талабларига жавоб берган тақдирда А.Авлоний номидаги педагогик маҳорат миллий институтида ташкил этиладиган менежерлик курсида ўқиши мумкин.
Бунда, менежерлик сертификатига эга бўлган номзодларга мактаб директори лавозими учун танловда иштирок этиш ҳуқуқи берилади.
Айтайлик, таълим муассасасида фаолият юритиб келаётган ўқитувчи менежерлик сертификатини қўлга киритди, бунда у фақатгина мактаб директори лавозими учун танловда иштирок этиш ҳуқуқига эга бўлади, аммо қўшимча устама ололмайди.
Чунки, Вазирлар Маҳкамасининг 2023 йил 25 декабрдаги 681-сон қарорининг 2-б бандида фақатгина менежерлик сертификатига эга бўлган раҳбар ходимларга (мактаб директорларига 50 фоиз, директор ўринбосарларига 30 фоиз) қўшимча устама тўлаб берилиши назарда тутилган.
Яъни, менежерлик сертификатига эга бўлган ўқитувчилар мактаб директорлигига ўтказилган танловдан муваффақиятли ўтиб, мактаб директори сифатида иш фаолиятини бошлаганидан кейин иш ҳақига 50 фоиз устама тўлаш бошланади.
Хулоса шуки, менежерлик сертификатига эга бўлган ўқитувчиларга мазкур устамалар тўлаб берилмайди.
