Хитой олий таълим муассасалари аниқ фанлар соҳасида жаҳон миқёсида етакчиликни қўлга киритди. CWTS Leiden Ranking халқаро рейтингига кўра, математика ва информатика йўналишида биринчи 30 та ўринни тўлиқ хитой университетлари эгаллаган.
Рўйхатда биринчи ўринни Ченгду шаҳрида жойлашган Хитой Электрон фанлар ва технологиялар университети эгаллаган. Математика ва дастурлаш бўйича энг яхши 50 та олийгоҳ орасида эса фақат еттита университет Хитойдан ташқарида жойлашган.
Физика ва муҳандислик йўналишларида ҳам хитой университетлари устунликни сақлаб қолган. Рейтингнинг дастлабки 25 поғонасидан 24 тасини Хитойдаги таълим муассасалари эгаллаган, ягона истисно — Япония Токиодаги Токио университети, у 24-ўринни эгаллаган. Энг яхши 50 талик рўйхатга эса атиги олти та хорижий университет кирган.
Агар барча йўналишлар — тиббиёт, гуманитар фанлар ва ер ҳақидаги фанлар — ҳисобга олинса, дунёнинг энг яхши 25 та университетидан 16 таси Хитойга тегишли. Рейтингда Чжэцзян университети биринчи ўринга лойиқ деб топилган.
CWTS Leiden Ranking — бу Нидерландиядаги Лейден университети ҳузуридаги Фан ва технологик тадқиқотлар маркази томонидан эълон қилинадиган халқаро университетлар рейтинги. Унда илмий нашрлар сони ва сифати, тадқиқотчиларнинг иқтибос (цитата) кўрсаткичи ҳамда илмий таъсир даражаси таҳлил қилинади. Айнан шу йўналишда Хитой университетлари мутлақ етакчиликни сақлаб қолмоқда.
Рейтинг 2024 йилда эълон қилинган бўлиб, унда 2019–2022 йиллар давомида эришилган илмий натижалар ҳисобга олинган.
