16 август куни Таълим хабарлари нашри ўзининг Telegram каналида абитуриентлар иштирокида сўровнома ўтказди. Унда жами 6807 нафар абитуриент қатнашди.
Сўров натижаларига кўра, абитуриентларнинг 51 фоизи давлат олий таълим муассасаларига қабул қилинганини маълум қилган. Бундан ташқари, 12 фоизи нодавлат олийгоҳларни танлаган бўлса, 9 фоизи супер-контракт асосида ўқишга киришни режалаштирган.
Шунингдек, сўровда қатнашганларнинг 7 фоизи бу йил ўқишга кира олмаганини ва келаси йили яна имтиҳон топширишни танлаганини билдирган.
Қолган 21 фоиз абитуриент эса олтинчи имконият натижаларини кутаётганини қайд этган.
Хўш, 6-имконият қачондан бошланади?
Ҳуқуқшунос Хушнудбек Худойбердиевнинг сўзига кўра, бу тартиб жорий 2025 йилдан кучга киради.
Ўқишга қабул қилиш тартиби қандай бўлади?
Ҳозирча аниқ тартиби тасдиқланмаган. Олий таълим, фан ва инновациялар вазирлиги мутахассисларининг маълум қилишича, вазирлик бир нечта вариант устида иш олиб бормоқда. Расмий тартиб тасдиқлангач, қўшимча маълумот берилади.
Кимлар учун?
Бу имкониятдан фақатгина танлаган бешала йўналишига ҳам (на грант, на контрактга) кира олмаган абитуриентлар фойдалана олиши мумкин. Агар абитуриент бирорта йўналишга қабул қилинган бўлса, бу тартиб ўқишган кирганлар учун амал қилмайди.
Яъни бу имконият фақат квотаси тўлмай қолган ўринлар ҳисобидан тақдим этилади. Агар бирор йўналишда барча ўринлар тўлган бўлса, унга олтинчи йўналиш сифатида танлов бўлмайди.
Олтинчи йўналишни танлашда абитуриентнинг фанлар мажмуаси мос келиши шарт. Масалан, биология фанидан имтиҳон топширган абитуриент юриспруденция йўналишини танлай олмайди.
