Хабарингиз бор, 2024 йилги ОТМларга кириш имтиҳонлари 14 июлдан 25 июлгача ўтказилган эди. Жорий йилги имтиҳон саналари ҳали расман тасдиқлангани йўқ.
Билим ва малакаларни баҳолаш агентлигидан Жамшид Одилов Kun.uz га берган интервьюсида 2025/2026 ўқув йили учун давлат олий таълим муассасаларига кириш имтиҳонлари катта эҳтимол билан 14 июлдан 25 июлгача бўлган кунларда ўтказилиши мумкин. Лекин бу ҳали расман тасдиқланмаган эканини билдирди.
«Кириш имтиҳонларидан 1 ҳафта аввал абитуриентлар шахсий кабинетларига кириб, рухсатномаларини тахминан 5-10 июль кунлари юклаб олишлари мумкин бўлади».
Шунингдек, тест синовлари учун бинолар рўйхати шакллантирилган. Ўтган йили имтиҳонлар 73 та бинода ўтказилган бўлса, бу йил дастлабки рўйхатда 90 та (захираси билан) бинода ўтказилиши режалаштирилган.
БМБА бошқарма бошлиғи Зафар Олимбековнинг таъкидлашича, рухсатномада абитуриентларни имтиҳонга қатнашиш санаси, сменаси ва локацияси аниқ кўрсатилган бўлади.
Якуний қарорлар ариза топшириш якунланганидан кейин қабул қилинади.
