9-10-11-синф ўқувчиларига «IBRO-2025» олимпиадасининг туман босқичида иштирок этиш учун яна бир имконият берилади.
Таълимни ривожлантириш маркази бўлим Ахборот хизмати раҳбари Шавкат Хўжақулов брифингда маълум қилишича «IBRO-2025» олимпиадасида рўйхатдан ўтган бироқ турли сабабларга кўра қатнаша олмаган 9-10-11-синф ўқувчилари 10-17 апрель кунлари testbor.uz платформасида дастлабки босқич имтиҳонларини онлайн тарзда топширишларига имконият берилади.
Бугунги кунга қадар олимпиадага 227 730 нафар ўқувчи рўйхатдан ўтган. Шундан 192 минг нафар математикадан, 19 минг нафар физикадан, 16 минг нафар ўқувчи информатика ва ахборот технологиялари фани бўйича рўйхатдан ўтган.
Ҳудудлар кесимида эса энг кўп иштирокчилар Фарғона, Бухоро ва Тошкент вилоятларидан рўйхатдан ўтган бўлса, Жиззах, Сирдарё ва Сурхондарё вилоятларида бу кўрсаткич нисбатан кам.
Олимпиада ғолиблари муносиб тақдирланади. 2–9-синф ўқувчилари учун пул мукофотлари ажратилади.
10–11-синф ўқувчилари ўртасидаги ғолиб ва совриндорларга эса ноутбук, планшет, мобил телефонлар, ақлли соатлар ва қулоқчинлар тақдим этилади. Хусусан, математика, физика ёки информатика фанларидан энг кўп ва энг тез ечимларни тақдим этган ўқувчига iPhone 16 смартфони совға қилинади.
Шунингдек, олимпиадада фаоллик кўрсатган, юқори натижаларни қайд этган таълим муассасаси жамоасига махсус бош соврин – BYD Чазор автомобили топширилади. Ўз фан йўналишида ТОП-10 натижа қайд этган ўқувчиларни тайёрлаган ўқитувчиларга ҳам алоҳида ташаккурномалар берилади.
