Google компанияси сунъий интеллектнинг янги экспериментал модели — Gemini 2.0 Flash Thinkingни тақдим этди.
Бу модель мураккаб масалаларни майда қадамларга ажратиб, «фикрлаш» жараёнини тушунтириш орқали ечим топиш учун мўлжалланган. Ушбу ёндашув моделнинг мулоҳаза юритиш қобилиятини кенгайтириш ва унинг жавобларининг аниқлигини оширишга қаратилган.
Модель намойиши давомида у қандай қилиб физика ва визуал-матнли вазифаларни ҳал қилаётгани, ечимга келиши учун қандай қадамларни бажараётгани батафсил кўрсатилди. Бу усул инсоннинг фикрлаш жараёнига ўхшамаса-да, машинага маълумотларни яхшироқ тушуниш ва қайта ишлаш имконини беради.
Мустақил lmarena.ai сайти томонидан ўтказилган дастлабки синовлар юқори натижаларни кўрсатди. Модель математика, ижодий ёзиш ва визуал вазифалар каби бир қатор йўналишларда етакчилик қилди.
Google «Gemini 2.0 Flash Thinking» ни ишлаб чиқувчилар учун Google AI Studio ва Vertex AI орқали Gemini APIда тақдим этди. Компания буни дастлабки версия сифатида намойиш этиб, ишлаб чиқувчиларни моделни бепул синаб кўриш ва ўз фикрларини билдиришга чақирмоқда.
Бу янги сунъий интеллект модели таълим, илм-фан ва бизнес соҳаларида янги имкониятлар эшигини очиши кутилмоқда.
