Охфорд Инсигҳтс ташкилоти томонидан «Ҳукуматнинг сунъий интеллектга тайёрлик индекси» рейтинги эълон қилинди. Ушбу рейтингда Ўзбекистон 53,45 балл билан 70-ўринни эгаллаб, 17 поғонага кўтарилди. Мамлакат Марказий Осиё давлатлари орасида 1-ўринни эгаллаб турибди.
Мазкур рейтинг ҳукуматнинг сунъий интеллект технологияларини жорий қилишга тайёрлигини баҳолайди ва 40 та индикатор асосида тузилади.
Мамлакатнинг ушбу ютуқлари ҳукумат томонидан тасдиқланган «Сунъий интеллект технологияларини 2030 йилгача ривожлантириш стратегияси» ҳамда бу соҳадаги изчил ислоҳотлар натижаси эканлиги таъкидланди.
Рейтингда Ўзбекистон Жанубий ва Марказий Осиё минтақасида Ҳиндистон ва Туркиядан кейин 3-ўринни эгаллаган.
Президент Шавкат Мирзиёев 13 август куни сунъий интеллект ва ИТ соҳасидаги стартап лойиҳаларни ривожлантириш чора-тадбирларига доир тақдимотда, сунъий интеллект бўйича қонунчилик базасини яратиш кераклигини айтганди.
Президент масъулларга сунъий интеллект технологиялари марказини ташкил қилиш бўйича топшириқ берганди.
Кейинроқ сунъий интеллект технологияларини 2030 йилга қадар ривожлантириш стратегияси тасдиқлангани ҳақида хабар берилганди. Сунъий интеллект технологияларини 2030 йилга қадар ривожлантириш бўйича эришиш лозим бўлган мақсадли кўрсаткичлар, шу жумладан:
-сунъий интеллект асосида яратилган дастурий маҳсулотлар ва кўрсатиладиган хизматлар ҳажмини 1,5 миллиард АҚШ долларига етказиш;
-ЙИДХП (my.gov.uz) да сунъий интеллект асосида кўрсатилаётган хизматлар улушини 10 фоизга етказиш;
-сунъий интеллект йўналишида фаолият юритувчи илмий лабораториялар сонини 10 тага етказиш ҳамда юқори қувватли ҳисоблаш серверларини ишга тушириш;
-ҳукуматнинг сунъий интеллектга тайёрлик индексида (Говернмент АИ Реадинесс Индех) Ўзбекистонни биринчи 50 та ўриндаги давлатлар қаторига киришига эришиш.
