Амалдаги малака тоифаси Олий, биринчи ёки иккинчи бўлиб, навбатдаги-мажбурий аттестацияда тегишли балларни тўплай олмаган педагогларнинг амалдаги малака тоифаси бир поғонага туширилади ва улар кейинги беш йил ичида навбатдаги-мажбурий аттестацияга жалб қилинмайдилар. Уларга нисбатан ҳеч қандай салбий ҳаракатлар амалга оширилмайди. Улар, фақат ўз хоҳишларига кўра навбатдан ташқари аттестацияларда иштирок этишлари мумкин (ҳеч қандай чекловларсиз).
Амалдаги мутахассис (олий маълумотли ўқитувчи) лавозимидаги педагог кадрлар навбатдаги мажбурий аттестациядан ўта олмаган тақдирда (55 балдан паст тўпласа ёки узрсиз қатнашмаган бўлса), иш берувчи ходимнинг малакаси етарли бўлмаганлиги сабабли у билан тузилган меҳнат шартномасини меҳнат тўғрисидаги қонунчилик ҳужжатларида белгиланган тартибда бекор қилиш ҳуқуқига эга (ишдан бўшатишга мажбур эмас).
44-1. Иш берувчи меҳнат шартномасини бекор қилмаган тақдирда, навбатдаги мажбурий аттестациядан ўта олмаган мутахассис (олий маълумотли ўқитувчи) лавозимидаги педагог кадр навбатдан ташқари аттестацияга кўпи билан уч марта жалб этилади.
Бунда уч мартадан бирортасида ҳам навбатдан ташқари аттестациядан ўта олмаган ёки узрли сабабсиз (касалликка чалиниши оқибатида узоқ муддатли меҳнатга қобилиятсизлик ҳамда давлат ёки жамоат вазифаларини бажарганлигидан ташқари ҳолларда) аттестацияда иштирок этмаган педагог кадр билан тузилган меҳнат шартномаси ходимнинг малакаси етарли бўлмаганлиги сабабли бекор қилинади.
