Шоҳруҳ Юсупов исмли йигит ўзининг инстаграмдаги саҳифасига уни ўқишга кириш учун ўқитган устозига машина совға қилганлиги ҳақида видео пост жойлади.
«Кўп йиллардан бери укаларим билан ният қилган орзумизга бугун етишдик. Кўп йиллар олдин менга ҳеч қандай таниш ёки яқин жойи бўлмаган бир ўқитувчи «мен сени математика ва физикадан текинга ўқитаман ва ўз кучинг билан ўқишга кирасан» деган ва 3 йил давомида ўқитди. Вақт ўтиб, мен грант асосида ўқишга кирдим. Бундан ташқари опам, синглим ва иккита укамни ҳам устоз ўқитди. Мана бугун устозга кичкинагина совғамиз бор, лекин уларнинг биз учун қилган меҳнатлари олдида бу жуда ҳам камлик қилади», – дейди Шоҳруҳ Юсупов.
Устоз Уткир Ҳақбердиев Самарқанд вилояти Оқдарё туманида физика фанидан абитуриентларни тайёрлаб келмоқда.
