Хориждан, шунингдек, Ўзбекистондаги давлат ёки нодавлат олийгоҳлардан ўқишини давлат олийгоҳига кўчиришни хоҳлаган талабгорлар бугун, 5 август куни, соат 23:59 гача ариза юборишлари керак.
Бунда аризалар қуйидаги саҳифалар орқали қабул қилинмоқда:
1. my.uzbmb.uz саҳифаси орқали:
– хорижий мамлакатларда фаолият юритаётган олий таълим ташкилотларидан (жумладан, халқаро тан олинган рейтингларда биринчи 1 000 та ўриндан бирини эгаллаган бўлса ҳам);
– Ўзбекистондаги нодавлат олий таълим ташкилотларидан;
– хорижий олий таълим ташкилотларининг Ўзбекистондаги филиалларидан.
2. transfer.edu.uz сайти орқали эса Ўзбекистондаги бир давлат олийгоҳидан бошқа давлат олийгоҳига ёки битта олийгоҳ ичида ўқишни кўчириш бўйича аризалар қабул қилинади.
my.uzbmb.uz сайти орқали ариза юборганлар тестга кириши керак. Шу сабабли улар тест учун тўлов қилишлари ҳам лозим. Тўлов қилмаганлар тестга киритилмайди.
Аризангиз ҳали ҳам «кўриб чиқилмоқда» мақомида турган бўлса, бундан хавотир олманг, демак, ҳужжатларингиз ўрганиб чиқилмоқда. Агар мабодо аризангиз рад этилса, қайта таҳрирлаш ва хатони тўғрилаш учун қўшимча вақт берилади.
