2024 йил 16 ноябрь куни Шарқий Хитойда содир бўлган пичоқлаш натижасида саккиз киши ҳалок бўлган ва 17 киши жароҳат олган, деб хабар берди CNN маҳаллий полиция баёнотига таяниб.
Ҳужум соат 18:30 атрофида Исин шаҳрида жойлашган Wuxi санъат ва технология касб-ҳунар институти ҳудудида содир бўлган, — дейилади полиция баёнотида.
Шунингдек, воқеа жойида бир нечта одамнинг ерда ҳаракатсиз ётгани, баъзиларининг атрофида томошабинлар тўпланган ҳолда қичқириқлар эшитилган.
Полициянинг хабар беришича, воқеа жойида қўлга олинган гумонланувчи яқинда ушбу институтни тамомлаган битирувчи бўлиб, «имтиҳондан ўтолмаслик, дипломни ололмаслик ва амалиёт учун берилган маошдан норози бўлгани» сабабли ушбу жиноятга қўл урган. Ҳозирда тергов ишлари давом этмоқда.
CНН таъкидлашига кўра, бундай ҳолат Хитойда содир бўлган охирги оммавий ҳалокатли воқеалардан бири бўлган. 1,4 миллиард аҳолига эга бўлган мамлакатда зўравонлик жиноятлари дунёдаги энг паст даражада бўлиб, бу қаттиқ қурол назорати ва кучли оммавий кузатув тизими туфайли таъминланган.
Шу сабабдан, ҳужум ҳақидаги хабар тарқалгач, ахборотни назорат қилувчи идора вакиллари ушбу воқеа акс этган видеоларни ўчириб ташлаган. Ижтимоий тармоқлардаги муҳокамаларни назорат қила бошлаган.
Маълумот учун, октябрь ойида Пекиндаги бошланғич мактаб яқинида 50 ёшли эркак уч бола ва яна икки кишини жароҳатлаган эди. Уни жиноят вақтида қўлга олинган. Сентябрь ойида Шанхайдаги шаҳар атрофи супермаркетида пичоқлаш ҳужуми оқибатида уч киши ҳалок бўлиб, яна 15 киши жароҳат олган эди.
Бундан ташқари, сентябрь ойида Шандонг провинциясининг Таиъан шаҳрида мактаб олдида ўқувчилар ва ота-оналар устига автобус урилиши натижасида 11 киши ҳалок бўлиб, яна 13 киши жароҳатланган. Хитой расмийлари ушбу ҳодиса тасодифийми ёки атайлаб содир этилганми, бу ҳақида маълумот бермаган.
