Ғазо уруши сабабли дунё бўйлаб кўплаб университет ва илмий ташкилотлар Исроил академик муассасалари билан ҳамкорликни тўхтатмоқда. Бунга Исроилнинг фаластинликларга қарши ҳаракатларида академик доиралар ҳам айбдор деган эътироз сабаб бўлмоқда.
Сўнгги йилларда Бразилия, Норвегия, Бельгия, Испания ва Ирландиядаги нуфузли олийгоҳлар Исроил университетлари билан илмий тадбир ва дастурларни бекор қилган. Амстердам университети Қуддусдаги Яҳудий университети билан талабалар алмашинувини тўхтатган.
Фаластинни қўллаб-қувватловчи фаоллар Исроил академияси давлат сиёсатини қувватлаётганини айтиб, университетларни ҳамкорликдан воз кечишга чақирмоқда. Бироқ Буюк Британия, Франция ва Германия олийгоҳлари эса академик бойкотга қарши чиқмоқда. Уларнинг фикрича, бу илмий эркинликка зиддир.
Айни пайтда, Европа Иттифоқи Исроилни илмий ҳамкорлик дастурларидан (Ҳоризон Эуропе) қисман чиқаришни таклиф қилган. Бу Исроил илм-фанига ажратилаётган йирик маблағларнинг камайишига олиб келиши мумкин.
Яҳудий тадқиқотчилар орасида браин драин — яъни илмий кадрларнинг мамлакатни ташлаб чиқиб кетиши хавфи ортиб бормоқда. Британиядаги фаластинлик жарроҳ, Глазгонинг собиқ ректори Ғассон Абу-Ситта вазиятга қуйидагича муносабат билдирмоқда:
«Академик бойкот Исроил ҳукуматини тўхтатишга мажбур қилувчи кучли восита бўлиши мумкин».
Академик бойкот кампанияси вакилларидан бири Стефани Адамнинг айтишича, яҳудий институтлари мамлакат олиб бораётган ҳарбий оккупация режими ва геноцидида шерик ҳисобланади. Маълумот ўрнида, Ғазода 2023 йил октябрь ойидан бери 64 мингдан ортиқ одам ҳалок бўлган, уларнинг кўпчилигини тинч аҳоли ташкил этади. БМТ экспертлари эса минтақада антропоген — инсон қўли билан яратилган очарчилик юзага келганини таъкидламоқда.
